Ձեր վստահելի աղբյուրը

«Ի տարբերություն ցանկացած այլ դատարանի, Բարձր դատարանը միակ դատարանն է, որ կարող է բացահայտել այս ընտրությունների ամբողջ կոնտեքստը»,- Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննության ժամանակ եզրափակիչ ելույթում ասաց «Հայաստան» դաշինքի ներկայացուցիչ Արամ Վարդևանյանը:

Ըստ նրա, այնպես ստացվեց, որ այս ընտրությունների կոնտեքստի մեջ առանցքային դերակատարում ունի 2020 թվականի նոյեմբերի 9-ի փաստաթուղթը, որն իրենց Հայաստանի  համար ենթադրում էր՝ հայրենիքի կորուստ, հազարավոր զոհեր, մարտիրոսված հերոսներ և բարդ ներքաղաքական իրավիճակ:

«Հայաստանը նոյեմբերի 9-ից հետո անվտանգ չէ, Հայաստանի քաղաքացիներն անվտանգ չեն: Մեր սահմաններն անառիկ չեն: Մենք Սահմանադրական դատարանում գործի քննություն ենք ունենում, բայց այդ ընթացքոմ գիտակցում ենք, որ մեր սահմաններից կարողանում է  թշնամին ներթափանցել ներս: Մենք նման խնդիր երբևէ չենք ունեցել, նման մարտահրավերների առաջ ՀՀ-ն երբևէ կանգնած չի եղել: Եվ այս ամբողջ իրադարաձությունների կոնտեքստի բացահայտման մեջ շատ կարևոր է 2018 թվականից հետո տեղի ունեցած իրադարձությունների հետևանքը:

Իսկ հետևանքն այն է, որ Հայաստանի վարչապետը փաստացի վերածվել է միապետի, ով նույնիսկ Հանրապետության նախագահի լիազորությունն է յուրացնում»,- ասաց Արամ Վարդևանյանը:

Նա հիշեցրեց, որ իրենց դիմումում ներկայացրել էին՝ այս ընտրությունների շղթան սկիզբ էր առել մարտից Հանրապետության նախագահի լիազորությունը վարչապետի կողմից իրացնելու միջոցով: Ըստ Վարդևանյանի, նշվածը սույն քննության ընթացքում չհերքվեց: 

Նա ասաց, որ առավել քան հստակ ներկայացրել են վարչական ռեսուրսի խնդիրը, որն առհասարակ խաթարել էր հավասարության և օրինականության սկզբունքն այս ընտրություններում: 

«Բավականաչափ խոսվեց, թե վարչապետը հրաժարական տալով կարո՞ղ էր շարունակել պաշտոնավարել, թե՞ ոչ: Այս հարցի ամենահստակ պատասխանն այն է, թե ինչու որոշեց բոլոր դեպքերում հրաժարական տալով հանդերձ շարունակել պաշտոնավարել: Դրա պատասխանը մեկն է՝ հենց վարչական ռեսուրսի չարաշահումն է, հենց մրցակցային առավելություն արհեստական ձևով ստանալն է»,- ասաց «Հայաստան» դաշինքի ներկայացուցիչը: 

Նա նշեց, որ Սահմանադրական դատարանն ի զորու է կանխելու հնարավոր նոր աղետները, կանխելու հնարավոր նոր զիջումները, նոր անհասկանալի փաստաթղթերը, նոր անհասկանալի գործողությունները:

«Իսկապես այս գործը պարզապես ընտրությունների արդյունքների վերաբերյալ վեճ չէ: Այս վեճերը զուտ ընտրական իրավունքի մասին չէ: Այն իր մեջ պարունակում է նաև քաղաքական բաղադրիչ: Բայց ի տարբերություն նախորդ բոլոր այլ ժամանակահատվածների, այս անգամ քաղաքական բաղադրիչը նաև պետական անվտանգության բաղադրիչի հետ է ուղղակիորեն փոխկապակցված:

Այս ընտրությունների արդյունքները չեն արտահայտում հայ ժողովրդի իրական կամքը, ԿԸՀ որոշմամբ ներկայացված պատկերը խեղաթյուրված է։ Մեր խնդրանք է, բարձր դատարան, բոլոր այն հիմքերը, որոնք մենք ներկայացրեցինք, որոնցից ոչ մեկի վերաբերյալ մենք փաստացի ուղղակի բացառում չտեսանք»,- ասաց «Հայաստան» դաշինքի ներկայացուցիչը։

Ելույթի վերջում Արամ Վարդևանյանն արձանագրեց. «Այս ընտրությունների վերաբեյալ մեր կողմից ներկայացված դիմումը հիմնավոր է, բավարար Սահմանադրական դատարանի կողմից 77-րդ հոդվածով նախատեսված գործիքակազմ իրացնելու համար: Կենտրոնական ընտրական հանձնաժողովի ընտրությունների արդյունքների վերաբերյալ որոշումն անվավեր է: Դրանից հետո բխող հետևանքները կորոշի Բարձր դատարանը»:

Արամ Վարդևանյանի եզրափակիչ ելույթը՝ ուղիղ եթերում:

Հիշեցնենք, որ ընտրությունների արդյունքներն անվավեր ճանաչելու «Հայաստան» դաշինքի, «Զարթոնք» ազգային քրիստոնեական կուսակցության, «Հայոց Հայրենիք» կուսակցության և «Պատիվ ունեմ» կուսակցությունների դաշինքի դիմումներով գործերը ՍԴ-ում  միավորել են ու  քննում են նույն նիստում։

ՍԴ-ից հայտնել էին, որ միավորման համար հաշվի է առնվել, որ ՀՀ Կենտրոնական ընտրական հանձնաժողովի 2021 թվականի հունիսի 27-ի` «Հայաստանի Հանրապետության Ազգային ժողովի 2021 թվականի հունիսի 20-ի արտահերթ ընտրությունների արդյունքներն ամփոփելու մասին» թիվ 184-Ա որոշման հետ կապված վեճի վերաբերյալ» գործերը վերաբերում են նույն հարցին։

Այս գործով դատաքննությունը սկսվել է հուլիսի 9-ից։