Ձեր վստահելի աղբյուրը

Իրավաբան Ռոբերտ Հայրապետյանի տեղեկություններով, Ազգային անվտանգության ծառայության, ոստիկանության մեծաթիվ աշխատակիցներ մուտք են գործել «Զանգեզուրի պղնձամոլիբդենային կոմբինատի» վարչական շենք, առանց պատճառաբանության սկսել են իրականացնել քննչական գործողություններ, չեն հայտնել, թե ինչ նպատակ են հետապնդում այդ գործողությունները:

Panorama.am-ի հետ զրույցում նա հայտնեց, որ կոմբինատի իգական սեռի բոլոր աշխատակիցներին տուն են ուղարկել, այնուհետև բերման են ենթարկել կոմբինատի անվտանգության դեպարտամենտի ղեկավար Արամ Գասպարյանին:

«Մինչ այդ խուզարկություն են իրականացրել անվտանգության դեպարտամենտի ղեկավարի աշխատասենյակում, ընդ որում՝ տևական ժամանակ խոչընդոտ են ստեղծել, որպեսզի պաշտպանը մուտք գործի աշխատասենյակ ու մասնակցի խուզարկությանը»,- ասաց Ռ.Հայրապետյանը:

Նա նշեց՝ ինչ կասկածանքով, ինչ հիմքով, ինչ գործի շրջանակներում են բերման ենթարկել Արամ Գասպարյանին, որևէ տվյալ հայտնի չէ, քանի որ բերման ենթարկողը հրաժարվել է  պատասխանել այդ հարցին: Նրան տեղափոխում են Երևան: 

Ռ.Հայրապետյանի տեղեկություններով, իրավապահները դեռ կոմբինատում են, բայց ավարտին են մոտենում քննչական գործողությունները: Նա նշեց, որ իր տեղեկություններով բացի Արամ Գասպարյանից, անվտանգության ևս մեկ աշխատակից է բերման ենթարկվել:

«Բերման ենթարկելու այս դեպքերն այն շղթայի շարունակությունն են, որը սկսվել է Քաջարանի համայնքապետի, Մեղրիի նախկին համայնքապետի կալանավորմամբ, այսօր շարունակվում է ԿԸՀ-ում Սիսիանի և Գորիսի համայնքապետերի կալանավորման միջնորդությունների քննությամբ: Շատ պարզ, պրիմիտիվ սցենարով վստահ եմ, որ նրանք էլ մինչև առավոտ առնվանզ կկալանավորվեն:

Այս ամենը մի բառով կարող ենք ընդունել որպես Սյունիքի հանձնման մեկնարկ, քանի որ չեմ հիշում այլ մարզ, որն ակտիվ դիմադրություն է ցույց տվել երկրի տարածքները  թշնամուն զիջելու հարցում, դրա տրամաբանական շարունակությամբ այս փուլում էլ չեմ տեսնում մեկ մարզ, որտեղ քաղաքական նպատակներով իրականացվում են այսչափ ապօրինություններ»,- ասաց Ռոբերտ Հայրապետյանը: 

Ինչ վերաբերում է նրան, որ ՀՀ պետական եկամուտների կոմիտեն առանց որևէ հիմնավորման խոչընդոտում է «Զանգեզուրի պղնձամոլիբդենային կոմբինատ»-ի կողմից պղնձի խտանյութի և ֆերրոմոլիբդենի արտահանմանը, Ռոբերտ Հայրապետյանն ասաց, որ այս դեպքում միջազգային կապիտալ ունեցող կազմակերպության մասին է խոսքը, ընդ որում Հայաստանն ունի մի շարք երկկողմ միջազգային պայմանագրեր, որտեղ կարմիր թելով անցնում է մի կարևոր կետ՝ այս ներդրողների իրավական պաշտպանությունը պետք է ապահովվի:

«Առնվազն միջազգային երկկողմ պայմանագրի տեսանկյունից կոպիտ խախտում է, քանի որ իրավական պաշտպանությունը չի ենթադրում այդ տեսակի խուզարկություններ, որոնք պետք է արվեն x անձի նեղ, քաղաքական, խաթարված քմահաճույքներ բավարարելու համար»,- ասաց իրավաբանը:

Նա ընդգծեց, որ այդտեղ կատարվել են գործողություններ, որոնք այդ նույն երկկողմ պայմանագրերի շրջանակներում կարող են անգամ դառնալ միջազգային արբիտրաժի քննության առարկա, դրա արդյունքում հնարավոր է պետական բյուջեից ահռելի գումարներ հանձնվեն:

Իրավաբանի կարծիքով, այս ամենը վարչապետի պաշտոնը հակասահմանադրական ճանապարհով զավթած Նիկոլ Փաշինյանի նեղ, խաթարված և այդպես էլ չբավարարվող քաղաքական ամբիցիաներին հագուրդ տալու համար է:

«Չմոռանանք, որ քարոզարշավի ընթացքում Նիկոլ Փաշինյանն ակնհայտ օգտագործելով ատելության խոսք՝ անդրադարձել է կոմբինատին ու թափահարելով իր ձեռքում գտնվող մուրճն ասել, որ հերթը հասնելու է «Զանգեզուրի պղնձամոլիբդենային կոմբինատ»-ին, աշխատակիցները թող սպասեն:

Կարծում եմ՝ այս ամենն այս հայտարարության ուղիղ շարունակությունն է, չունի որևէ իրավական հիմք, հետապնդում է բացառապես քաղաքական նպատակ՝ գոհացնելու համար այդ պաշտոնը զավթած անձին»,- ասաց Ռ.Հայրապետյանը: