Ձեր վստահելի աղբյուրը

Վերաքննիչ քրեական դատարանում՝ դատավոր Նարինե Հովակիմյանի նախագահությամբ, կազմով՝ դատավորներ Սևակ Համբարձումյանի և Կարեն Մարդանյանի, մեկնարկել է ՀՀ երկրորդ նախագահ Ռոբերտ Քոչարյանի, Արմեն Գևորգյանի, Սեյրան Օհանյանի և Յուրի Խաչատուրովի նկատմամբ ՀՀ քրեական օրենսգրքի 300.1-րդ հոդվածով դադարեցնելու մասին որոշման դեմ բողոքների գործով դատական նիստը:

Մեղադրող դատախազ Գևորգ Բաղդասարյանը նախորդ դատական նիստին միջնորդություն էր ներկայացրել՝ ՍԴ դիմելու և գործի վարույթը կասեցնելու մասին: Այսօր կայացած դատական նիստին դատախազի միջնորդության վերաբերյալ պաշտպան Էրիկ Ալեքսանյանն ասաց, որ դժվար է պատկերացնում նշված միջնորդության՝ այս փուլում լուծումը, քանի որ դա կարող է կանխորոշել բողոքի քննության արդյունքում կայացվող որոշումն, ինչն անթույլատրելի է և կիմաստազրկի բողոքի քննությունը:

Ռ. Քոչարյանի պաշտպանական խմբի անդամ Հովհաննես Խուդոյանն ասաց, որ դատախազությունը բովանդակազուրկ միջնորդությամբ փորձում է ցույց տալ ինտենսիվ աշխատանք, որ ձախողված քրեական վարույթով դատախազությունը չի հանձնվում, շարունակում է աշխատել, մինչդեռ նախատեսելի էր այս վարույթի տվյալ ընթացքը, հոդվածի հակասահմանադրականության հարցը բարձրացվել է դեռևս նախաքննության փուլում:

Ըստ նրա, պաշտպանության կողմի իրավունքները սահմանափակող նորմերը չեն կարող կիրառություն ունենալ, մինչդեռ, ներկայացված միջնորդությամբ դատախազությունն ակնկալում է դատարանի միջոցով հասնել ՍԴ և ՍԴ-ի միջոցով հասնել օրենքի բացի ճանաչման, որը կարող է հիմք հանդիսանալ օրենսդրական փոփոխությունների, որը սույն գործով կիրառվել չի կարող, այն չի կարող ազդել գործի քննության վրա, ուստի, միջնորդությունը բովանդակազուրկ է, արդյունք չի ապահովում:

Ռ. Քոչարյանի պաշտպանական խմբի անդամ Հայկ Ալումյանն ասաց, որ մեղադրող Բաղդասարյանը մի քանի անգամ ասել է, որ իրենք  ինչ-որ փաստեր սխալ են ներկայացնում, փորձեց ցույց տալ, որ իրենք ինչ-որ մանիպուլյացիաներ են անում փաստերով, բառը չի կիրառել, բաց փաստացի դա էր ասում:

«Համոզված եմ, որ մեր առարկություններն ամբողջությամբ վերաքննիչ դատարանն ընկալեց: Ավելին՝ անգամ համոզված եմ, որ մեղադրողները շատ ճիշտ հասկացան, թե ինչ ենք մենք ներկայացնում և ինչու: Այդ դեպքում հարց է առաջանում՝ ինչո՞ւ են մեղադրողները մեր ներկայացրածն փորձում ներկայացնել նենգափոխված ձևով, հետո նոր փորձ անում հերքել: Ո՞ւմ համար են իրենք դա անում:

Ո՞ւմ համար են մեղադրողները նենգափոխում մեր ներկայացրած առարկությունները:

Տեսախցիկների հետևում գտնվող դիտողների համար: Միայն ու միայն»,- ասաց Ալումյանը:

Դատարանը հայտարարեց միջնորդության քննարկումն ավարտված, հեռացավ որոշում կայացնելու: