Ձեր վստահելի աղբյուրը

Հարավային Կորեայի Մունգյոնգ քաղաքում շարունակվում են Համաբանակային 6-րդ ամառային խաղերը: Հոկտեմբերի 10-ին մրցագորգ է դուրս եկել հունահռոմեական ոճի ըմբիշ, 66 կգ քաշային Կարեն Ասլանյանը: Այս մասին տեղեկացնում է ՀԱՕԿ-ի պաշտոնական կայքը:

Երիտասարդների աշխարհի առաջնության նախկին չեմպիոնը պայքարն սկսել էր 1/8 եզրափակչից, որտեղ 9:4 հաշվով վստահ հաղթանակ էր տարել ուկրաինացի Դենիս Դեմյանկովի նկատմամբ: Հայ ըմբիշի հաջորդ մրցակիցը լեհ Դավիդ Կարեչինսկին էր, ում Ասլանյանը հաղթել էր 11:2 հաշվով: Կիսաեզրափակիչ գոտեմարտում լարված պայքարում Ասլանյանը 10:9 հաշվով առավելության էր հասել Եգիպտոսի ներկայացուցիչ Հուսեին Մուհամեդի նկատմամբ: Եզրափակիչում հայ ըմբիշը 0:6 հաշվով զիջեց կորեացի Ջի Հուն Կիմին և դարձավ Համաբանակային 6-րդ ամառային խաղերի արծաթե մեդալակիր:

Սա Հայաստանի հավաքականի 2-րդ մեդալն էր: Հոկտեմբերի 9-ին հունահռոմեական ոճի ըմբիշ, 80 կգ քաշային կարգի Սարգիս Քոչարյանը դարձել էր խաղերի բրոնզե մեդալակիր: Համաշխարհային բանակային խաղերն անցկացվում են արդեն 6-րդ անգամ:

Նշենք, որ այս տարի խաղերին մասնակցում են 110 երկրի 8700 մարզիկ: Հայաստանն առաջին անգամ է մասնակցում Համաբանակային խաղերին: Մեր հավաքականը Կորեա է մեկնել 15 մարզիկով, ովքեր իրենց ուժերն են չափում հունահռոմեական և ազատ ոճի ըմբշամարտում, ձյուդոյում, թաեքվոնդոյում և հեծանվասպորտում: