Ձեր վստահելի աղբյուրը

«Ադրբեջանը փորձում է ներկայացնել, թե Հայաստանը դեմ է և խոչընդոտում է սահմանազատման ու սահմանագծման աշխատանքներին։ Իրականությունը ուղիղ հակառակն է․ Ադրբեջանն է դեմ սահմանազատման ու սահմանագծման աշխատանքներին, որովհետև ասպարեզ է բերել ակնհայտորեն կեղծված քարտեզներ՝ փորձելով հիմնավորել իր զինված ուժերի ներկայությունը ՀՀ ինքնիշխան տարածքների մի շարք հատվածներում, մասնավորապես, հայ ադրբեջանական սահմանի Սոթք-Խոզնավար հատվածի մի շարք տեղանքներում»,- այս մասին այսօր Կառավարության նիստի մեկնարկին հայտարարեց ՀՀ վարչապետի պաշտոնակատար Նիկոլ Փաշինյանը՝ պատասխանելով Ադրբեջանի նախագահ Իլհամ Ալիևի նախօրեի  հայտարարություններին։

Փաշինյանի խոսքերով, ինչպես միջազգային հանրությունը, այնպես էլ Հայաստանը հստակ արտահայտել են իրենց դիրքորոշումն այս հարցի վերաբերյալ․ տվյալ տարածքներից Ադրբեջանի զինված ուժերի դուրս բերում, սահմանագծից և Հայաստանի, և Ադրբեջանի զինված ուժերի  հայելային հետ քաշում մշտական տեղակայման վայրեր, սահմանագծին ռուս սահմանապահների, և-կամ միջազգային դիտորդների տեղակայում և միջազգային դիտորդների հովանու ներքո սահմանագծման ու սահմանազատման աշխատանքների նախապատրաստություն և մեկնարկ։

«Այս առաջարկը շարունակում է մնալ ուժի մեջ»,-ասաց Փաշինյանը, հավելելով, որ Ադրբեջանը որևէ կերպ չի արձագանքել այս առաջարկին։

Փաշինյանն ասաց, որ Ադրբեջանը փորձ է անում տպավորություն ստեղծել, թե Հայաստանը դեմ է խաղաղությանն ու խաղաղության պայմանագրին։ Մինչդեռ ՀՀ-ն արդեն մի քանի անգամ հրապարակային ողջունել է ԵԱՀԿ Մինսկի խմբի համանախագահների ապրիլի 13-ի հայտարարությունը, որում կոչ է արվում կողմերին՝ առաջին իսկ հնարավորության դեպքում վերսկսել բարձր մակարդակի քաղաքական երկխոսությունը՝ համանախագահների հովանու ներքո, հայտնի սկզբունքների հիման վրա։

«Ուզում եմ հիշեցնել, կողմերին լավ հայտնի սկզբունքները, որոնց մասին խոսվում է այս հայտարարության մեջ ու որոնք դրված են ղարաբաղյան հակամարտության հիմքում երեքն են՝ ժողովուրդների ինքնորոշում, ուժի կամ ուժի  սպասռնալիքի բացառում և տարածքային ամբողջականություն։ Համանախագահների այս հայտարարությունը որ այլ ինչ է, քան տարածաշրջանում խաղաղության հաստատման ճանապարհային քարտեզի առաջարկ ու Հայաստանը ողջունել է այս առաջարկը»,-ասաց Փաշինյանը։

Փաշինյանը կրկնեց, որ «Հայաստանը պատրաստ է ղարաբաղյան խաղաղ կարգավորման  գործընթացի վերսկսմանը՝ համանախագահների հայտարարության մեջ նշված ֆորմատով և բովանդակությամբ»։

«Ադրբեջանի ղեկավարությունը լավ կանի, որ ապակառուցողական գործողությունների ու հայտարարությունների փոխարեն անսա միջնորդների հորդորներին ու նույնպես հստակ դիրքորոշում  հայտնի համանախագահների հայտարարության  վերաբերյալ։ Հստակ է, որ մենք նախանձախնդիր հետապնդելու ենք Արցախի ժողովրդի ինքնորոշման իրավունքի իրականացմանը»,-ասաց Փաշինյանը։

Փաշինյանի խոսքերով, եթե այս ամենին ավելացնում ենք Ադրբեջանի սադրիչ, Հայաստանի տարածքային ամբողջականությանը սպառնացող հայտարարությունները, ակնհայտ է դառնում, թե որ երկիրն է խոչընդոտում տարածաշրջանային կայունության և խաղաղության հաստատմանը։

Փաշինյանն ասաց, որ Ադրբեջանը տարածքային նկռտումներ ունի իր հարևանների մեշամասնոթւյան նկատմամբ, ինչը մեր տարածաշրջանային կայունությունն ու խաղաղությունը կասկածի տակ դնող հիմնական գործոնն է։ Անհախ ամեն  ինչից, Հայաստանը պաշտպանելու է իր ինքնիշանությունն ու տարածքային ամբողջականությունը։