Ձեր վստահելի աղբյուրը

«Սունիքի համայնքապետերի կալանավորումը պետք է նախ և առաջ ընկալել որպես անձնական վրեժխնդրություն»,- ԱԺ-ում լրագրողների հետ զրույցում ասաց ԱԺ անկախ պատգամավոր Աննա Գրիգորյանը։

Նա նշեց, որ համայնքապետերն ամբողջ պատերազմի ընթացքում եղել են առաջնագծում, Գորիս համայնքը, որի ղեկավարն այսօր ձերբակալվում է, 2019-ին ճանաչվել է լավագույն համայնք: Ա. Գրիգորյանը նաև հիշեցրեց, որ Նիկոլ Փաշինյանը պատերազմի ժամանակ, երբ գնացել էր Սյունիք, ասել էր կազմակերպել Սյունիքի ինքնապաշտպանությունը, բոլոր համայնքապետերը մեկտեղվել էին, գնացել ապահովելու Սյունիքի անվտանգությունը:

«Եվ այդ ամենից հետո նման վերաբերմունք այն մարդկանց նկատմամբ, որոնք ոչ միայն խաղաղ պայմաններում իրենց բնակիչների և իրենց համայնքի կողքին էին, նաև պատերազմի ժամանակ  առաջնագծում էին, որևէ կերպ չէին պատրաստվում զիջել, մինչև չեկավ այն լուրը, որ դեկտեմբերի 17-ին հակապետական քայլ է կատարվել, և մենք պետք է հետ քաշվենք, մարդիկ այնտեղ կանգնած էին: Այս  մարդկանց նկատմամբ է կատարվում այս քաղաքական հետապնդումները, ինչն անթույլատրելի է»,- ասաց պատգամավորը:

Աննա Գրիգորյանի դիտարկմամբ, համայնքապետերի նկատմամբ այս հետապնդումները արժե դիտարկել նաև Ադրբեջանի նախագահ Իլհամ Ալիևի հայտարարությունների լույսի ներքո։

«Երբ խոսում է Զանգեզուրը պատմական ադրբեջանական հողեր լինելու մասին, միաժամանակ Հայաստանի իշխանությունները գլխատում են Սյունիքի համայնքները, որպեսզի այնտեղ տանեն իրենց խամաճիկ ներկայացուցիչներին, նրանց միջոցով կատարեն այն քայլերը, որոնք հնարավոր է տեղի ունենան թե միջանցքային տրամաբանության մեջ, թե նոր զիջումների համատեքստում:

Ուղղակի ապշելու է, թե ինչպիսի սինխրոնիզացված աշխատանք է տեղի ունենում Ադրբեջանի ղեկավարության հայտարարությունների և մեր գործող իշխանությունների քայլերի միջև»,- ասաց պատգամավոր Աննա Գրիգորյանը: