Ձեր վստահելի աղբյուրը

«Այս քայլերով այս հանցավոր կառավարությունը փորձում է, և իր մոտ ստացվում է, մասնատի Սյունիքը՝ չեզոքացնելով համայնքապետերին»,- դատարանի մոտ, որտեղ այս պահին քննվում է Գորիսի համայնքապետ Առուշ Առուշանյանին կալանավորելու միջնորդությունը, լրագրողների հետ զրույցում ասաց «Հայաստան» դաշինքի առաջնորդներից «Վերածնվող Հայաստան» կուսակցության նախագահ Վահե Հակոբյանն՝ անդրադառնալով Սյունիքի համայնքապետերի կալանավորումներին։

Նա համոզված է, որ դատարանը բավարելու է քննչական մարմնի պահանջն ու կալանավորելու է Առուշ Առուշանյանին։

«Նա պատերազմի առաջին օրվանից եղել է առաջնագծում, նաև հետպատերազմյան շրջանում։ Նույնը  Քաջարանի քաղաքապետ Մանվել Փարամազյանը, որն արդեն մեկ շաբաթից ավելի փակի տակ է, արգելված են այցելությունները, փորձում են ինֆորմացիոն կոլապսի մեջ պահեն»,- ասաց Վ.Հակոբյանը։

Նա համոզված է, որ դատարանն այսօր բավարարելու է նաև Սիսիանի համայնքապետ Արթուր Սարգսյանի կալանքի միջնորդությունը։

«Ի՞նչ ունեցանք։ Սյունիքն առանց մարտնչող համայնքապետերի է մնում»,- ընդգծեց Վ. Հակոբյանը։

«Հայաստան» դաշինքի առաջնորդն ասաց, որ եթե այսպես շարունակվի, իրենք ցանկացած քայլի պատրաստ են և փողոց են դուրս գալու։

Վահե Հակոբյանի խոսքով, տարբեր լեզուներով նամակներ են պատրաստել դեսպանների, միջազգային կառույցների համար, եթե չեն նկատում, թե ինչ է տեղի ունենում Հայաստանում հետընտրական շրջանում, իրենք մանրամասն ներկայացնում են դրանցում։

«Հայաստանը դարձել է բռնապետություն, ԱԱԾ-ն, քննչական մարմինը, ՀՔԾ-ն, ՊԵԿ-ի քննչական մարմինն այսօր դարձել են մեկ հոգու կամակատարներ, ով  հիստերիկի նման առավոտյան կիսահարբած վիճակում արթնանում է ու ասում՝ սրան փակեն, նրան փակեն։

Քանի որ իրենք օգտվել են այն հանգամանքից, որ մեզանից գողացան մեր հաղթանակը, ոգևորվել են»,- ասաց Վահե Հակոբյանը՝ ընդգծելով, որ պայքարելու ենք մինչև վերջ, գնալու է մինչև վերջ, որպեսզի այս իշխանությունը վայրկյան առաջ հեռանա։