Ձեր վստահելի աղբյուրը

«Ադրբեջանի նախագահը խաղաղություն ասելով պատկերացնում է ռազմավարի պուրակներ, տարածքային ակնհայտ հավակնություններ Հայաստանի ինքնիշխան տարածքի նկատմամբ»,- Ազգային ժողովի արտահերթ նիստում իր ելույթում ասաց «Իմ քայլը» խմբակցության անդամ Տաթև Հայրապետյանը:

Նա մասնավորապես անդրադարձավ Ադրբեջանի նախագահի հայտարարություններին՝ նշելով, որ բավականին սպառնալից տոնով խոսում է այն մասին, որ եթե Հայաստանը չգնա խաղաղության պայմանագրի կնքմանը, ապա կարող է առերեսվել նոր պատերազմի հետ:

«Կարծում եմ՝ Ադրբեջանի պատկերացրած խաղաղությունը շատ հեռու է  իրական խաղաղությունից, որին ձգտում են բոլոր ժողովուրդները և բոլոր մարդիկ»,- ընդգծեց նա:

Տ.Հայրապետյանի խոսքով, Ադրբեջանի Ազգային ժողով ակնհայտորեն տարածքային հավակնություններ է ներկայացում Սյունքի մարզի նկատմամբ փոխխոսնակի մակադակով, անվանում դա ադրբեջանական հող, որտեղ իրենք պետք է վերադառնան:

«Այդ նույն թեզը շարունակում է Ադրբեջանի ղեկավարը: Ահա այս ձևով, այս թեզերով ու գործելաոճով, երբ Հայաստանի սուվերեն տարածք է ներթափանցել ադրբեջանական զորքերը, Ադրբեջանի նախագահը խոսում է  խաղաղության մասին:

Իրականում սա  խոսույթ չէ խաղաղության մասին, խոսույթ է լարվածության նոր օջախների ստեղծման մասին: Սրանով Ադրբեջանն ակնհայտ մարտահրավեր է  նետում առանց այն էլ բավականին փխրուն տարածաշրջանային կայունությանը: Եվ այս ամենը,  իհարկե, ստանում է  Անկարայի բացարձակ աջակցությունը և Շուշիի հայտնի հռչակագիրը դրա վառ ապացույցն է»,- ասաց պատգամավորը:

Նա խնդրեց Հայաստանի միջազգային գործընկերներին որևէ կերպ տուրք չգնալ Ալիևի քարոզչությանը, չանել գործողություններ, չհնչեցնել տեքստեր, որոնք  կարող են արդարացնել պատերազմը և ագրեսիան, քանի որ սա սպառնալիք է ոչ միայն  Հայաստանի ու Արցախի քաղաքացիներին,  այլ սպառնալիք է համայն քաղաքակիրթ մարդկությանը: