Ձեր վստահելի աղբյուրը

«Ես ուզում եմ հավատալ, որ մեր արդարադատության դեռ ինչ-որ փշրանքներ մնացել են։ Ակնկալիք ունենք՝ կհայտնվի ինչ-որ մի դատավոր, որն իր սկզբունքներին դեմ չի գնա և այս շինծու, ապօրինի գործերին վերջ կտա հիմա»,- դատարանի բակում լրագրողների հետ զրույցում ասաց «Հայաստան» դաշինքի անդամ Վահե Հակոբյանը՝ խոսելով Սյունիքի համայնքների ղեկավարների կալանավորումների մասին:

Նա նշեց, որ դեռ երեկ էր համոզված՝ Գորիսի քաղաքապետ Առուշ Առուշանյանին կկալանավորեն:

«Մեղադրանքն առաջադրվել է մի կնոջ ցուցմունքի հիման վրա, որը մի քանի անգամ փոխել է ցուցմունքը։ Իբրև Առուշանյանը հրավիրել ու իրենց ուղղորդել է, որ պետք է աշխատենք «Հայաստան» դաշինքի օգտին։ Դա այդ կնոջ երրորդ ցուցմունքն է, որն արդեն իրենից կորզել են, երբ ինքն արդեն գտնվում էր կալանավայրում։

Համոզված եմ, որ այդ կինը եղել է ճնշումների տակ»,- ասաց Վահե Հակոբյանը։

Նրա խոսքով, այս ամենը վրեժխնդրության հետևանքներն են, համոզված է, որ կկալանավորեն նաև Սիսիանի քաղաքապետին, սպասում են «Զանգեզուրի պղնձամոլիբդենային կոմբինատի» անվտանգության ղեկավարի հարցով դատարանի որոշմանը, ում ձերբակալել են առանց որևէ հիմքի, կալանքի միջնորդություն է ներկայացվել:

«Մարդը ստաբիլ տեմպերով գլխատում է և Սյունիքը, և «Զանգեզուրի պղնձամոլիբդենային կոմբինատը»»,- ասաց Վահե Հակոբյանը:

Անդրադառնալով Երասխի հատվածում ադրբեջանական կողմի ակտիվությանը՝ նա ասաց. «Փաշինյանը փոխանակ պայքարի արտաքին թշնամու դեմ, պայքարում է մեր ընկերների, այն մարդկանց  դեմ, որոնք զենքը ձեռքին առաջին օրվանից պատերազմին են մասնակցում։

Հաշվի առնելով այն, ինչ-որ մենք տեսնում ենք միջազգային մամուլում, համոզված եմ, որ շատ շուտով Հայաստանը, ի դեմս այս կառավարության, ստորագրելու է  ինչ-որ իքս փաստաթուղթ, համաձայն որի՝ մենք տալու ենք տարածքներ, անկլավներ, ճանապարհներ։

Կարո՞ղ եք ասել՝ ինչ տրամաբանություն կա մարտունակ գեներալներից մեկին ազատել ծառայությունից այս պայմաններում»։

Նա նշեց, որ այժմ «Զանգեզուրի պղնձամոլիբդենային կոմբինատում» խուզարկությունները չեն շարունակվում, զմռսվել է ու շարունակում է այդպես մնալ հաշվապահության ամբողջ բլոկը, ինչը պարալիզացրել է ողջ հիմնարկի աշխատանքը:

«Կոմբինատը հնարավորությունը չունի վճարել մատակարարներին, արդեն երկու շաբաթ է հանքանյութի արտահանման պրոցեսը կանգնած է, մենք կանգնած ենք լուրջ խնդրի առաջ: Դա ենթադրում է տուգանքներ, որ ապրանքը տեղ չի հասել, ապրանքը կուտակելու տեղ էլ չունենք»,- ասաց Վահե Հակոբյանը: