Ձեր վստահելի աղբյուրը

«Իմ տպավորությունն այն է, որ Սահմանադարական դատարանը վաղուց է կայացրել իր որոշումը, միգուցե մինչև դիմումները ՍԴ ներկայացնելը»,-  ասուլիսում ասաց ՍԴ աշխատակազմի նախկին ղեկավար Էդգար Ղազարյանը՝ խոսելով ՍԴ-ում հունիսի 20-ի ընտրությունների արդյունքներն անվավեր ճանաչելու վերաբերյալ քաղաքական 4 ուժերի դիմումների դատաքննության մասին:

Նա նշեց, որ ՍԴ-ն իր որոշումը պետք է հրապարակի ամենաուշը վաղը:

Է.Ղազարյանն ասաց, որ ՍԴ-ն ընտրությունների արդյունքները վիճարկող դիմումները քննող նիստերն իրականացրել է ոչ լեգիտիմ կազմով, քանի որ ՍԴ 9 դատավորներից 5-ը եղել են ոչ լեգիտիմ՝ Արման Դիլանյան, Վահե Գրիգորյան և այն երեք դատավորները, որոնք ՍԴ են մտել ոչ սահմանադրական ճանապարհով իրականացված սահմանադրական փոփոխություններից հետո:

«Իսկ 5 դատավորն, այսինքն ոչ լեգիտիմ կազմն այն անհրաժեշտ թվաքանակն է դատավորների որոշում կայացնելու համար»,- նշեց նա:

Նրա խոսքով, ՍԴ նիստը նախագահել է  Արման Դիլանյանը, ինչի իրավունքը  նա չուներ, քանի որ նրան ՍԴ նախագահ ընտրելու վերաբերյալ դատարանը որոշում չի կայացրել:  Է. Ղազարյանն ասաց, որ համաձայն Սահմանադրության, ՍԴ-ն  իր ֆունկցիաներն իրականացնում է  որոշումների և եզրակացությունների միջոցով: Նիստը, ըստ ՍԴ աշխատակազմի նախկին ղեկավարի, պետք է նախագահողը լիներ տարիքով ավագ դատավորը՝ Աշոտ Խաչատրյանը:

Է. Ղազարյանի գնահատմամբ, ՍԴ նախագահող Արման Դիլանյանը նիստի ժամանակ տարօրինակ հայտարարություն է արել, որ մինչև դատական նիստի մեկնարկը կապի մեջ է եղել դատավարության մասնակիցների հետ՝ նշելով, որ դա արվել է պարզելու, թե ում ինչքան ժամանակ է անհրաժեշտ ելույթների համար:

«Սա հակաօրինական է ու աննախադեպ: ՍԴ-ն դատավարության մասնակիցների հետ կարող է շփվել միայն  դատական  նիստի շրջանակներում, արտադատավարական ցանկացած շփում անօրինական է ու կասկածի տակ է դնում այդ դատարանի գործունեության լեգիտիմությունն ու ազնվությունը: Այսինքն դատարանն արտադատավարական շփումների մեջ է  եղել դատավարության մասնակիցների հետ: Իսկ քանի որ դատավարական մասնակից է նաև «Քաղաքացիական պայմանագիր» կուսակցությունը,  ոստիկանությունը, որն անմիջապես  ենթարկվում է վարչապետին, պարզ է, կարելի է ենթադրել, թե ինչ շփումներ են ունեցել և ինչ բովանդակություն կարող է ունեցած լինել դատարանի վերջական որոշման վրա ազդելու իմաստով»,- նշեց նա:

Անդրադառնալով պատասխանող կողմին՝ դատախազություն, ոստիկանություն,  Հեռուստատեսության և ռադիոյի հանձնաժողով, Է. Ղազարյանն ասաց, որ այդ մարմինները որևէ կապ չունեն բողոքարկման առանցքում գտնվող ԿԸՀ որոշման հետ:

«Արհեստական կերպով մարմիններ են ներգրավել: Ի դեպ, դատավարության ողջ ընթացքում այդ մարմինները պաշտպանել են Վահե Գրիգորյանի և Արման Դիլանյանի տեսակետները»,- ընդգծեց Ղազարյանը:

Նրա ներկայացմամբ, մյուս չափազանց տարօրինակ որոշումը, որը ՍԴ-ն կայացրել էր նիստից առաջ, որն ունի նաև քաղաքական կարևոր բովանդակությունը, «Քաղաքացիական պայմանագիր» կուսակցությանը  որպես երրորդ անձ գործին ներգրավելն է. «Ընտրություններին մասնակցել են 26 քաղաքական ուժ, 4-ը բողոքարկել է ԿԸՀ որոշումը, մյուս 22 ուժերից միայն մեկին՝ ՔՊ-ին, որի ղեկավարը Փաշինյանն է, ներգրավել են որպես երրորդ անձ»:

Խոսելով հիմնական զեկուցող ՍԴ դատավոր Էդգար Շաթիրյանի մասին, նա նշեց, որ 4 դիմումները միավորել էին մեկ գործի մեջ ու նշանակել միայն մեկ զեկուցող:

«Ի դեպ, դատարանի ամենաերիտասարդ դատավորն է, փորձառության տեսանկյունից ամենաանփորձը, վերջին փոփոխություններով դատարան եկած և ընդամենը 1 տարի դատարանում պաշտոնավարող դատավորն է, որն, ի դեպ, կառավարության կողմից առաջադրված  դատավորի թեկնածուն էր:

Ակնհայտ դարձավ, որ այդ գործով զեկուցող դատավորը, թե իր անփորձությունից ելնելով, թե ժամանակային իմասով չէր հասցրել բավարար չափով ուսումնասիրել դիմումները, դրանց փաստական հանգամանքները, չի իրականացրել պատշաճ վերլուծություններ, համադրություններ: Նրա ելույթից  պարզ դարձավ, որ պատշաճ ձևով գործը չի նախապատրաստել ու չի ներկայացրել դատավորներին, դատավարության մասնակիցնեին, ինչն արդարադատության որակի վրա բացասաբար անդրադառնալ չէր կարող»,- ասաց Է. Ղազարյանը:

Նրա խոսքով, տպավորություն կար, որ դատավորներից շատերը գիտեին, թե ինչ որոշում է  կայացնելու և հավելյալ ջանքեր, նեղություն չէին տալիս լրացուցիչ անհանգստություն ցուցաբերելու համար:

«Իմ տպավորությամբ, արձանագրումներով Սահմանադարական դատարանի նիստն ընթացել է  այնպիսի էական իրավախախտումներով և օրինախախտումներով, որ արդեն հիմք է  հանդիսանում դատարանի ցանկացած որոշում կասկածի տակ դնելու համար: 

Ներքին համոզմունք ունեմ, որ դատարանը ԿԸՀ որոշումը թողնելու է անփոփոխ: Այդ տպավարությունն եմ ստացել: Հայաստանի պատմության մեջ դեռ դեպք չի եղել, որ ՍԴ-ն չեղարկի ընտրությունների արդյունքները, առավել ևս՝ այս դատավորը, այս կազմով»,- ասաց Է. Ղազարյանը: 

Ըստ նրա, շատ դատավորներ հասկացել են, որ պողպատե մանդատը կարող է իջնել իրենց գլխին. «Պարզվում է, որ բանտիկներով մուրճը կարող է իջնել սրա կամ նրա գլխին, ՍԴ բակի հարթ մշակված ասֆլտը կարող է պատրաստվում է  հյուրընկալելու ինչու չէ նաև ՍԴ դատավորներին, քանի որ պողպատե մանդատը ունի սահմանադրության տեքստ»: 

Ասուլիսն ամբողջությամբ՝ տեսանյութում: