Ձեր վստահելի աղբյուրը

«Իշխանությունը խափանում է երկրի խոշորագույն հարկատուներից մեկի՝ «Զանգեզուրի պղնձամոլիբդենային կոմբինատ»-ի աշխատանքը»,- «ՀՀ քաղաքական և իրավական մարտահրավերները»  թեմայով կոնֆերանսին ասաց Այլընտրանքային նախագծեր խմբի փորձագետ Էլինար Վարդանյանը:

Նա նշեց, որ օրեր առաջ Ալիևը  կազմակերպում է Զանգելանի և հարակից շրջանների իբր բնակիչների իբր բողոքը  Գերմանիայի  իշխանություններին ընդդեմ կոմբինատի՝ պահանջելով դադարեցնել կոմբինատի գործունեությունը բնապահպանական նպատակներով:

«Հաջորդ  օրը Նիկոլն իր հերոսական ուժայիններին ուղարկում է  կոմինատ, այնտեղ մասկի շոուներ ու չգիտեմ ինչեր են իրականացնում»,- նշեց նա: 

Էլինար վարդանյանն անդրադարձավ նաև երեկվա բացահայտումներին՝ 2018 թվականին Փաշինյանի, հրեա բլոգեր Ալեքսանդր Լապշինի, այսօր Ուկրաինայում ՀՀ դեսպան Վլադիմիր Կարապետյանի մասնակցությամբ:

«Ես չեմ ուզում ստանձնել դատավորի դեր ու տալ գնահատականներ, բայց, կարծում եմ, որ սա պետք է լինի իրավապահների ուշադրության կենտրոնում:

ՀՔԾ-ն, ԱԱԾ-ն, այսօր արդեն իսկ պետք է այդ հայտարարությունների հիման վրա ձեռնամուխ լինեն քրեական գործ հարուցելուն, իսկ ԱԺ-ում առաջին նիստերի ընթացքում հենց պետք է դրվի քննիչ հանձնաժողով ստեղծելու հարցը, որը կուսումնասիրի  պատերազմի  հետ կապված խնդիրները, նաև այդ բացահայտումները, որոնք արվեցին երեկ»,- ասաց փորձագետը:

Նրա խոսքով, Հայաստանն ընտրություններից հետո  շարունակում է  մնալ պայթյունավտանգ, ոչինչ չի փոխվել:

«Մենք դարձյալ կանգնած ենք ներքին ու արտաքին ծանր  մարտահրավերների առջև, դարձալ ստիպված ենք ելքեր գտնել: Մեր կազմակերպության տեսակետն անփոփոխ է՝  Հայաստանին պետք է նոր, սոլիդ իշխանություն: Քանի դեռ չկա սոլիդ իշխանություն, մեր երկիրը գտնվելու է անկայունության, նորանոր ռիսկերի առջև:

Մենք պարտավոր ենք ստեղծել պետական տեռորի դեմ դիմադրության համակարգեր, պարտավոր ենք գտնել հանրության կոնսոլիդացիայի նոր  գաղափարներ: Մենք վստահ ենք, որ ճիշտ աշխատելու դեպքում հասարակությանը շատ արագ կվերանայի ընտրության արդյունքները»,- ասաց Էլինար Վարդանյանը: :

Հիշեցնենք, որ երկօրյա կոնֆերանսը կազմակերպվել է Այլընտրանքային նախագծեր խմբի նախաձեռնությամբ: Կոնֆերանսի այսօրվա թեման է՝ «Հետընտրական հայաստան», հուլիսի 17-ի թեման՝ «Հայաստանի իրավական մարտահրավերները»: