Ձեր վստահելի աղբյուրը

Իրանի արդյունաբերության, հանքերի և առևտրի փոխնախարար Ալի Ռասուլյանը հայտարարել է, որ հայկական շուկան հատուկ հնարավորություն է իրանական փոքր և միջին ձեռնարկությունների համար, հատկապես սննդամթերքի, կենցաղային տեխնիկայի և չարազեղենի ոլորտում: Այս մասին գրում է Pars Today-ը։

Ալի Ռասուլյանն այսօր IRNA-ին տված հարցազրույցում ասել է.«Պետք է պայմաններ ստեղծվեն իրանական ընկերությունների, հատկապես փոքր և միջին ձեռնարկությունների հայաստանյան շուկայում ներկայության համար»:

Ռասուլյանը հավելել է. «Հայաստանը ԵԱՏՄ-ի անդամ է, որը կարող է համարվել իրանական ապրանքների տարանցիկ ուղի դեպի Ռուսաստան և նույնիսկ պատժամիջոցների պատճառով՝ դեպի եվրոպական երկրներ»:

Փոխնախարարը, կարևորելով այս հնարավորությունն օգտագործելու անհրաժեշտությունը, ասել է․ «Այս երթուղուց մենք կարող ենք արտահանել ապրանքներ, մատակարարել տեխնոլոգիաներ, ինչպես նաև մեքենաներ և տեխնիկական և ինժեներական ծառայություններ»:

Ռասուլյանը նշել է նաև, որ վերջին երկու ամիսների ընթացքում Իրանի արտադրական և արդյունաբերական կարողությունների առաջին ցուցահանդեսն անցկացվեց Երևանում, որն ուղեկցվեց իրանական ընկերությունների մեծ ներկայությամբ:

Նա հավելել է. «Հայաստանի արդյունաբերությունը խիստ կարիք ունի մեր երկրի արդյունաբերության և կարող ենք այս ճանապարհով լավ օգուտներ ապահովել երկրի համար»: