Ձեր վստահելի աղբյուրը

«Իրականում տեղի ունեցավ մի գործողություն, որը մի դրվագով ևս պատկերավոր բնորոշեց, թե այսօր ինչ երկրում ենք ապրում և ինչ վարչախմբի պայմաններում»,- «ՀՀ քաղաքական և իրավական մարտահրավերները» թեմայով կոնֆերանսին ասաց «Ճշմարտություն սերունդների համար» նախաձեռնության հիմնադիր, քաղաքագետ Գեղամ Նազարյանը, ով ոստիկանությունից ուղիղ եկել էր կոնֆերանսի վայր։

Հիշեցնենք, որ քիչ առաջ Այլընտրանքային նախագծեր խմբի փորձագետ Էլինար Վարդանյանը հայտարարել էր՝ բերման են ենթարկել Գեղամ Նազարյանին։

Գ. Նազարյանը պատմեց, որ շտապում էր այստեղ միջոցառմանը, մեքենայից իջել է, քայլել դեպի կոնֆերանսի վայր, նկատել է, որ երեք կարմիր բերետավոր կոպիտ հրելով մի երիտասարդ աղջկա են բերման ենթարկում։

«Հեգնաբար ասացի՝ ճիշտ եք անում, շատ ամուր սեղմեք, ես էլ եմ կասկածում, որ Իլհամ Ալիևը հենց  ինքն է։ Ոչ մի արձագանք չեղավ, շարունակում էին բերման ենթարկել։ Ես էլ քայլեցի։ Մոտենում էի շենքին, վազքի ձայներ լսեցի, չէի պատկերացում, որ իմ հետևից է։ Երեք-չորս կարմիր բերետավորներ էին, մեկն էլ ասում էր՝ գլուխը խփեք գետնին, նենց արեք, գլուխը խփեք գետնին։ Կարծում էին՝ հեշտ պետք է ինձ խփեն գետնեին, 4 հոգով չէին կարողանում անգամ շարժել, հետո հավաքվեցին, մի 15-20 հոգով, զգացի, որ ձեռքս կոտրում են, ես ինքս ինձ գցեցի գետնին, որ ձեռքս չկոտրեմ։

Հետո տեղափոխեցին մեքենա, որից հետո ոստիկանության Մաշտոցի բաժին։ Այնտեղ հանդիպում ես  մի այլ խումբ ոստիկանների, որոնք ևս զզվում են այդ վիճակից, ինչ իրենց մատուցում են, սուտ տեղեկանք, որ իրենց ներկայացվում է։

Կարմիր բերետավորները թուղթ են բերում, իբր ինձ բերման են ենթարկել ոչ թե «Էրեբունի պլազայի» մոտից, այլ իբր Տիգրան Մեծ պողոտայից, իբրև մասնակցել եմ ինչ որ ակցիայի, չեմ ենթարկվել ոստիկանության՝ տարածքը լքելու օրինական պահանջին։

Ստախոսություն, ինչպես պաթալոգիկ ստախոս է Նիկոլը։

Ընդ որում, այնտեղ որևէ մեկին չի հետաքրքրում՝ պատգամավորի թեկնածու ես, ով ես, ով չես»,- նշեց Գեղամ Նազարյանը։

Նրա խոսքով, այսպես նրանք իրենց են պառկացնում գետնին։

«Էյֆորիկ վիճակն իրենց մոտ է, որ կարծում են, ընտրության արդյունքները կեղծելով, կարողանալու են բռնաճնշումներով իրենց դիրքերն ամրացնել։ Իհարկե, չի ստացվելու։ Եվս մի փորձ է, ավելի է հանրությանը զայրացնում, ատելությամբ լցվում»,- նշեց քաղաքագետը։ 

Հարցին՝ կարո՞ղ են արձանագրել, որ հատուկ կազմակերպված գործողություն էր, միգուցե կապված էր իր երեկվա գրառման հետ, նա պատասխանեց. «Չեմ կապում, բայց այն ուշացումը, որով եկան իմ հետևից, հասկացա, որ ինչ որ մեկը հրահանգել է՝ գալ իմ հետևից»։

Նա նշեց՝ քանի դեռ Նիկոլի վարչախումբը պահում է երկրի ղեկը ձեռքին, նման երևույթներ կլինեն։

«Մի ամբողջ երկիր են ասֆալտին պառկացրել, հազարավոր մարդ են սպանել, Գեղամին ձերբակալելը կամ բերման ենթարկելը ջրի mi կաթիլ է, ընդամենը ցույց է տալիս այն, ինչ վիճակում գտնվում ենք։
Բերման ենթարկելու ընթացքում մտածում էի, որ այս վիճակն այնքան անհեթեթ է, որ եթե նույնիսկ փողոց մեկ մարդ դուրս չգա պայքարի, ինքն իրեն փլվելու է այս փտած մեխանիզմը։ Դատարակության վրա ինչքան ուզում են 5 միլիարդ նվիրել, միևնույնն է՝ այս վարչախումը չի կարող երկիր ղկավարել»,- ասաց Գեղամ Նազարյանը։