Ձեր վստահելի աղբյուրը

«Չէի ասի, որ այս տարի ընդունելության քննություններում «Հայոց լեզու» առարկայից գնահատականները ցածր էին. «Հայոց լեզվի» գնահատականները տարիներ շարունակ նույն միջին միավորն են ապահովել»,- ասուլիսում ասաց Գնահատման և թեստավորման կենտրոնի փոխտնօրեն Կարո Նասիբյանը:

Նա նշեց, որ ցածր են լինում բոլոր քննությունների գնահատականները, որոնք կազմակերպվում են լրացուցիչ՝ երկրորդ փուլում:

«Տարիներ շարունակ փորձը ցույց է տալիս, որ երկրորդ փուլում քննություն հանձնողների կամ կեսը կամ 2/3-ը ստանում են անբավարար գնահատականներ»,-ասաց Նասիբյանը:

Ինչ վերաերում է քննությունների ժամանակ դիմորդների կողմից տարբեր սարքրեի օգնությանը դիմելուն, ԳԹԿ փոխտնօրենն ասաց. «Արդեն մեզ համար սովորական է դարձել, որ դիմորդի մոտ հայտնաբերում ենք հեռախոս, էլեկտրոնային այլ սարքեր, որոնք ամրացված են լինում մարմնի տարբեր մասերին:

Եբեմն նույնիսկ այդ սարքերը վարձով են վերցնում, համապատասխան գումարը մուծում են, 1-2 օրով վերցնում են օգտագործելու և հետ վերադարձնելու համար: Նման դեպքերը նախկինում ավելի շատ էին:

Նախկինում լինում էր, որ դիմորդը քննական կենտրոն գալիս էր առնվազն 3 հեռախոսով. մեկը հանձնում էր, երկրորդը իբր հայտնաբերում էինք մենք մինչև քննություն սկսվելը, որպեսզի մտքովդ չի անցնում, որ կարող է ունենալ 3-րդ, 4-րդ հեռախոսներ: Հիմա այդ դեպքերը քչացել են: Կարծում եմ՝ անցել են ավելի բարձր տեխնոլոգիաների»: