Ձեր վստահելի աղբյուրը

ԵՄ ղեկավարության վրդովմունքն են հարուցել  Amnesty International-ի և Ֆրանսիական «Forbidden Stories» շահույթ չհետապնդող կազմակերպության հետաքննության արդյունքները, համաձայն որի՝ աշխարհի մի շարք կառավարություններ օգտագործել են իսրայելական Pegasus ծրագիրը՝ լրտեսելու գործարարներին, իրավապաշտպաններին և լրագրողներին: Այս մասին գրում է Euronews-ը։

Եվրամիությանն ամենաշատն անհանգստացնում է ԶԼՄ-ների ազատությանը սպառնացող վտանգը։
Միևնույն ժամանակ, Բրյուսելը հասկացրել է, որ իրենք զգուշությամբ են մոտենում հետաքննության բացահայտումներին և թվերին:

«Դա միանգամայն անընդունելի է: Դա հակասում է ցանկացած ԵՄ կանոններին և օրենքներին, որոնք վերաբերում են մամուլի ազատությանը: Ազատ լրատվամիջոցները ԵՄ հիմնարար արժեքներից մեկն են: Եթե մեր լսածը ճիշտ է, ապա դա բոլորովին անընդունելի է»,- ասել է Եվրոպական հանձնաժողովի նախագահ Ուրսուլա ֆոն դեր Լեյենը։

Այն երկրների շարքում, որտեղ Pegasus-ը, ըստ զեկույցի, օգտագործվում է կառավարության կողմից՝ Ադրբեջանն է, Ղազախստանը, Հունգարիան, Հնդկաստանը: Իրավապաշտպանների խոսքով՝ իսրայելական ընկերությունը չի համագործակցել Ռուսաստանի իշխանությունների հետ:

Հասարակական կազմակերպություններն ասում են, որ իրենց տրամադրության տակ կա 50,000 կոտրված համար: Դրանց թվում են Մերձավոր Արևելքի միապետությունների իշխող ընտանիքների անդամների, նախարարների, իրավապաշտպանների և լրագրողների հեռախոսները: