Հայտնվել է նոր ստատուս քվո, նոր խաղացողներ այս տարածաշրջանում․ Մարկեդոնով
«Սահմանների դեմարկացիայի ու դելիմիտացիայի հետ կապված, ոչ այլ ոք, քան Նիկոլ Փաշինյանն ասել է՝ Ռուսաստանի դերն այստեղ բացառիկ է, ու ինքը համաձայն է Ռուսաստանի արած առաջարկների հետ»,- այս մասին ասում է Մոսկվայի Միջազգային հարաբերությունների պետական ինստիտուտի առաջատար գիտաշխատող, քաղաքագետ Սերգեյ Մարկեդոնովը՝ խոսելով հայ-ադրբեջանական սահմանին իրավիճակի լարման, սահմանների սահմանազատման մասին։
Նրա խոսքով՝ Հայաստանում վերջերս տեղի ունեցան ընտրություններ ու հենց այս քաղաքական գործչին ընտրեցին. «Կարելի է նրան անվանել պարտված կամ դավաճան, ինչպես անում են, բայց ընտրությունները եղել են բավական բաց, այս հարցում համընկել են ՀԱՊԿ-ի ու ԵԱՀԿ-ի դիտորդների կարծիքները, անգամ ՀՀ ՍԴ-ն օրեր առաջ ընտրությունները լեգիտիմ համարեց»։
Իսկ թե արդյոք Ռուսաստանը հաշվի առնում է արտաքին խաղացողների դիրքորոշումները՝ Մարկեդոնով նշում է․«Անշուշտ, ինչպես հաշվի չնստել 80 մլն բնակչությամբ երկրի հետ (Թուրքիայի-խմբ․), որը ՆԱՏՕ-ում ունի երկրորդ ռազմական պոտենցիալն ԱՄՆ-ից հետո»։
«Հայտնվել է նոր ստատուս քվո, հայտնվել են նոր հավակնություններ այս տարածաշրջանում, նոր խաղացողներ, ու այդ խաղացողներն ինչ-որ վերացական միջազգային հանրություն չէ, այլ Անկարան։ Այս խաղացողի հետ Մոսկվայի հարաբերությունները բավական բարդ ու լարված են, բարդ դինամիկա է Սիրիայում, Լիբիայում, Կիպրոսի շուրջ։ Այս ամենը պահանջում է շահերի ընդհանուր բազմակողմանի հաշվի առնում»,- ընդգծում է Մարկեդոնովը։
Ինչ վերաբերում է Ֆրանսիային կամ ԱՄՆ-ի մեկնաբանություններին, ապա դրանք քաղաքագետը լուրջ չի համարում։
«Մակրոնը կարող է ասել գեղեցիկ բաներ, առաջիկայում նախագահական ընտրություններն են։ Կարվեն երկու-երեք հայտարարություններ, հնարավոր է բանաձևեր խորհրդարանում Ղարաբաղի ճանաչման մասին, ինչպե՞ս այն ազդի իրական պատկերի վրա՝ ոչ մի ձևով։ Ռեալ, արտաքին խաղացողները, որոնք աշխատում են տարածաշրջանում՝ Ռուսաստանն ու Թուրքիան են»,- ասում է Մարկեդոնովը, հավելելով, որ ամբողջությամբ դուրս չի կարելի թողնել նաև ԱՄՆ-ին, քանի որ այժմ ԱՄՆ-ը հետևում է իրավիճակին ու այս ուղղությունը այդ երկրի համար դեռևս չափազանց կարևոր չէ։
«Ամեն դեպքում, այս բոլոր խաղացողները գործելու են իրենց շահերին համապատասխան»,- նշում է Մարկեդոնովը։
Հարակից հրապարակումներ`
Լրահոս
Տեսանյութեր
Քաղաքապետարանը գործնականում թալանում է երևանցիներին. Չախոյան
