Ձեր վստահելի աղբյուրը

Վրաստանում համաճարակաբանական իրավիճակը լրջորեն վատթարացած է: 1tv.ge-ի հաղորդմամբ, այս մասին ասել է Վրաստանի Հիվանդությունների վերահսկման ազգային կենտրոնի ղեկավար Ամիրան Գամղրելիձեն: Ըստ նրա, այս ֆոնին հատկապես կարևոր է հետևել հանձնարարականներին: Խոսելով խնդրի մասին՝ Գամղրելիձեն շեշտել է փակ տարածքում շնչադիմակ կրելու անհրաժեշտությունը:

«Վտանգը լուրջ է, ուստի մենք բոլորս պետք է գիտակցենք, որ համաճարակային իրավիճակը վատթարանում է, մենք լուրջ ալիքի մեջ ենք մտնում: Այսօրվա և երեկվա տվյալները կրկնում են այն, ինչ ունեցել ենք մայիսի գագաթնակետին, ինչպես նաև նոյեմբերի սկզբին: Մենք պետք է հետևենք բոլոր հանձնարարականներին, առաջին հերթին՝ փակ տարածքում շնչադիմակ կրենք: Կանոնակարգ է գործարկվում նաև շնչադիմակը բաց տարածքներում կրելու վերաբերյալ, որտեղ հավաքվում ենք», – ասել է Ամիրան Գամղրելիձեն:

Ամիրան Գամղրելիձեն հերթական անգամ հասարակությանը կոչ է արել խուսափել մեծ հավաքույթներից:

Բացի այդ, ըստ Հիվանդությունների վերահսկման ազգային կենտրոնի ղեկավարի, համաճարակը հաղթահարելու բանալին պատվաստումն է: Ըստ Գամղրելիձեի, երկրում բավականաչափ պատվաստանյութեր կան, ուստի քաղաքացիները պետք է օգտվեն այս հնարավորությունից և պատվաստվեն:

«Մենք արդեն անցնում ենք կարմիր գծերը: Վերջին յոթ օրվա ընթացքում կորոնավիրուսից մահացությունը բարձր է: Երեխաների մոտ վարակման աճ կա, բայց մենք տոկոսային մեծ ցատկ չունենք», – ասել է Ամիրան Գամղրելիձեն:

Նա հայտնել է, որ Վրաստանում 30-40 տոկոսը վարակված են հնդկական շտամով, և վիրուսի տարածման ցուցանիշը շատ արագ է աճում: