Ձեր վստահելի աղբյուրը

Չինաստանի Հենան նահանգի վարչական կենտրոն Չժենչժոու քաղաքում ավարտվել է սաստիկ ջրհեղեղի հետևանքով հեղեղված մետրոյի տարհանումը, հայտնում է Չինաստանի կենտրոնական հեռուստատեսությունը ՝ վկայակոչելով ՉԺՀ-ի արտակարգ իրավիճակների նախարարությունը:

«Հորդառատ անձրևները հանգեցրել են նրան, որ հուլիսի 20- ին Չժենչժոու քաղաքի մետրոյի հինգերորդ գծի թունելում մեծ քանակությամբ ջուր է կուտակվել, գնացքների երթևեկությունը դադարեցվել է, ուղևորները արգելափակված են եղել վագոններում», - նշված է նախարարության հայտարարության մեջ:

Արգելափակված ուղևորներին փրկելու համար փրկարարները կտրել են վագոնի տանիքը:
«Ուղևորները բարեհաջող տարհանվել են»,-հայտարարել են փրկարարները ՝ հստակեցնելով, որ Չժենչժոու մետրոյի հինգերորդ ճյուղից տարհանվել է ավելի քան 500 մարդ:

Ջրհեղեղի հետևանքով զոհվել է 12 մարդ, ևս հինգ մարդ տարբեր աստիճանի ծանրության վնասվածքներ են ստացել:

Ավելի վաղ Չինաստանի Հենան նահանգում ջրհեղեղն ավերել էր ջրամբարի պատնեշը ։
Չժենչժոու քաղաքի բնակչությունը կազմում է ավելի քան 10 մլն մարդ:

Հենան նահանգից տարհանվել է ավելի քան 100 հազար մարդ։ Չինաստանում նաև բարձրացվել է արտակարգ իրավիճակների համազգային արձագանքման մակարդակը ՝ երրորդից մինչև երկրորդ մակարդակ: