Ձեր վստահելի աղբյուրը

ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանի կարծիքով՝ այս շրջանում քաղաքական ռեպրեսիաները մի կողմից ճնշում էր Սահմանադրական դատարանի վրա, մյուս կողմից մեսիջ տեղական ինքնակառավարման մարմինների ընտրություններից առաջ։

«Ընդհանուր պատկերի մեջ ևս մեկ էլեմենտ է։ Մի քիչ  ավելի լայն պետք է նայել այս բռնաճնշումներին, ո՞ր ժամանակահատվածում էր դա արվում։ Կարծում եմ՝ էական ճնշում էր Սահմանադրական դատարանի նկատմամբ՝ ցույց տալու համար, մտածեք, թե ինչ որոշում եք կայացնելու։ Մարդկանց շինծու մեղադրանքներով կալանավորվում էին այն ժամանակ, երբ ՍԴ-ում քննում էին ընտրությունների արդյունքներն անվավեր ճանաչելու վերաբերյալ քաղաքական ուժերի բողոքը»,- Երկիր Մեդիա», «5-րդ ալիք», «Հայկական երկրորդ հեռուստաալիք» հեռուստաընկերություններին տված հարցազրույցում ասել է ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը։

Նա նշել է, որ այդ բռնաճնշումներն արվում են նաև սպասվելիք տեղական ինքնակառավարման մարմինների ընտրությունների համար, մեսիջ է՝ խելոք պահեք, եթե խելոք չպահեք, յուրաքանչյուրիդ հետ կարող է կատարվել նույնը։

«Սա է նպատակը, այսպես պետք է ասենք՝ բարի գալուստ դեպի Սադամ Հուսեյնի Իրաք։ Մոտավորպես այդ ճանապարհն ենք բռնել։ Համենայնդեպս, իմ տպավորությունն է, որ այս իշխանության ցանկությունը հենց դա է և ժողովրդավարության բաստիոնը ոնց որ դարձնում է ժողովրդավարության գերեզմանոց։ Նաև այսպես կբնութագրեմ այն, ինչ կատարվում է  Հայաստանում»,- ասել է Ռ. Քոչարյանը։

ՀՀ երկրորդ նախագահը հիշեցրել է, որ երեք տարի առաջ իրեն մի շինծու գործով մեղադրանք էին առաջադրել. «Անցնելով այս ամեն ինչով՝ ես ավելի շատ ուժեղ եմ դուրս եկել այս պայքարից, քան երեք տարի առաջ էի։ Յուրաքանչյուր համայնքապետ, որ հիմա կալանավորված է, այդ վիճակից դուրս է գալու  շատ ավելի ուժեղ։ Ուղղակի կասկած չունեմ, քանի որ մեղադրանքները շնծու են, նեղ խմբակի տակտիկական շահերին է ամեն ինչ ծառայեցվում»։

Ըստ «Հայաստան» դաշինքի առաջնորդի համոզման, նաև ընդհանուր վախի մթնոլորտ են ուզում այդպես ստեղծել, որ մարդիկ ավելի քիչ քննադատեն իրենց։

Պատասխանելով հարցին՝ արդյո՞ք սպասելի էր ՍԴ որոշում, նաև հետընտրական շրջանում խոսվում է «Քաղաքացիական պայմանագիր» կուսակցության լեգիտիմության մասին,
արդյո՞ք այդ որոշումը հանել է այդ հարցը, Ռոբերտ Քոչարյանն ասել է. «Ուշադրությամբ հետևում էի ՍԴ նիստերին, մտքեր էի փոխանակում տարբեր մարդկանց հետ։ Տպավորիչ էր փաստարկների տեսանկյունից և «Հայաստան» դաշինքի, և մյուս դիմողների փաստարկները։ Ամենից  հետաքրքիրն այն է, որ որևէ հակափատարկ, որևէ հիմնավորում չենք լսել, ուղղակի չկար։

Էլ չեմ ասում ՔՊ ներկայացուցիչներն ուղղակի բան չունեին ասելու, դատախազությունը հանդես էր գալիս որպես կառավարության փաստաբան։ Զավեշտալի է, բայց այդպես է

Ցավոք, ՍԴ որոշման մեջ մեր կողմից բարձրացված մի շարք հարցերի վերաբերյալ ևս չկան պատասխաններ»։

Ռ. Քոչարյանի խոսքով, Հայաստանում որևէ ընտրություն չի հիշում, երբ այս ծավալի վարչական ռեսուրս է կիրառվել, երկրի առաջին դեմքը ֆիզիկական հաշվեհարդարի սպառնալիքներով հանդես է եկել ընդդիմախոսների նկատմամբ։

«Երբ ՍԴ-ն խոստորեն չի անդրադառնում այդ երևույթներին, նշանակում է մեկ բան՝ դրանք դառնալու են մեր քաղաքական մշակույթի անբաժանելի մաս։

Այդպես է լինելու և պատասխանատվությունը և ՍԴ-ի, և ԿԸՀ-ի, և դատախազության վրա է։

Այս ամենը համադրելով, խոսելով, որ այս իշխանությունը լեգիտիմ է, ուղղակի ավելորդ է։ Իհարկե, այս իշխանությունը լեգիտիմություն ձեռք չի բերել այս ընտրությունների արդյունքում»,- նշել է ՀՀ երկրորդ նախագահը։

Նրա կարծիքով, ՍԴ-ի կողմից նման որոշում չպետք է լիներ. «Մարդկայնորեն կարելի է հասկանալ այսպիսի մթնոլորտում բավարար խիզախություն չունենալը, բայց պրոֆեսիոնալիզմի առումով և  երկրի ապագայի նկատմամբ պատասխանատվության զգացումի տեսանկյունից, իհարկե, անթույլատրելի էր։

Որոշման մեջ խստությամբ չարձանագրել որոշ երևույթներ, անթույլատրելի է, նշանակում է՝ համաձայնվել դրա հետ և նպաստել, որ այդ դրսևորումները Հայաստանում դառնան քաղաքական մշակույթի մաս»։

Ռ. Քոչարյանը նշել է՝ իրենք չեն ասում, որ այս  իշխանությունը քիչ ձայներ է ստացել, իրենք վիճարկում էին մոտ 200 հազար ձայն, բայց այն, ինչ կատարվում էր պետական մարմինների կողմից, բավարար հիմքեր էին տալիս ՍԴ-ին վերանայել շատ բան։ Հույս են ունեցել, որ ՍԴ որոշումը կլիներ մի քիչ այլ։