Ձեր վստահելի աղբյուրը

«Ընտրություններով չեն վերացվել այն պատճառները, որոնք բերել են ներքաղաքական ճգնաժամ։  Ընտրությունը ժամանակի մեքենա՞ է, կարո՞ղ է ժամանակը հետ պտտեցնել, թե՞ չի կարող։ Հասկանալի է, որ չի կարող»,-«Երկիր Մեդիա», «5-րդ ալիք», «Հայկական երկրորդ հեռուստաալիք» հեռուստաընկերություններին տված հարցազրույցում ասել է ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը։

Նա վստահեցրել է, որ այն, ինչ կատարվել է 2020 թ. հոկտեմբեր, նոյեմբերին, այս քաղաքական թիմին միշտ հետապնդելու է։

«Մոտ 400 հազար մարդ քվեարկել է այն քաղաքական ուժերի օգտին, որոնք այս իշխանություններին համարում էին դավաճան, կապիտուլյանտ, ապիկար։ Այս մարդիկ մնացել են Հայաստանում, այս մարդիկ, ի դեպ, երևի իրենց ակտիվությամբ, իրենց գիտակցությամբ, վերլուծելու ունակությամբ մեր որակյալ բնակչության հատվածն է։ Հիմա ո՞նց է կարելի այս պայմաններում խոսել քաղաքական ճգնաժամի հաղթահարման մասին։

Մենք մի շարք հարցերի պատասխաններ չունենք՝ ինչպե՞ս ենք կորցրել Շուշին, Հադրութը։ Այդ պատասխանները չունենալու պարագայում՝ հնարավոր չէ խոսել ներքաղաքական ճգնաժամի հաղթահարման մասին։

Չի կարող այդպիսի բան լինել»,- ասել է ՀՀ երկրորդ նախագահը։

«Հայաստան» դաշինքի առաջնորդի խոսքով, միգուցե այս պահի համար սրությունը նվազ է, կարող է մեկ ամիս հետո սուր հնչողություն ստանալ՝ ընտրություններն անցյալը չեն ջնջում։

Ռ. Քոչարյանն ասել է, որ 400 հազար քաղաքացու այդպիսի կողմնորոշումը  բավական լուրջ հանրային ընդվզում է, չի հավատում, թե այդ 400 հազարից գոնե մեկն իր կարծիքը փոխելու է այնքան ժամանակ, մինչև իր կողմից հնչեցված  հարցերի պատասխանները չլինեն։

«Մենք ողջամիտ որևէ պատասխան, բացատրություն չենք ստացել, թե այս պատերազմը պլանավորված պարտությո՞ւն էր, թե ինչ էր...։ Եթե  համարում եք, որ այս տարանջատումը բավարար չէ երկիրը յուրաքանչյուր պահի նոր քաղաքական ակտիվացման շրջանի մեջ մտնելու համար, սխալվում եք՝ այդպես չէ։

Սա մի ական է, որը լինելու է երկրի քաղաքական կյանքում այնքան ժամանակ, մինչև այդ հարցերի պատասխանները մեր հանրությունը չստանա»,- իր վերլուծությունում նշել է նա։

Ռ. Քոչարյանը պարադոքս է համարել, որ գյուղն այս իշխանությունների կողմից ամենից անտեսված ոլորտն է և հենց գյուղական բնակավայրերում այս իշխանությունները ստացել են ամենաշատ քվեն. «Պարադոքս է, բայց այդպես է։ Ազդակ է բոլոր հաջորդ իշխանությունների համար, որ ինչքան  վատ ես վերաբերում գյուղին, այնքան լավ քո քաղաքական հեռանկարների համար»։

Հարցին՝ ինչու «Հայաստան» դաշինքը չհաղթեց, Ռոբերտ Քոչարյանը պատասխանել է. 

«Սա այն հարցն է, որ հուզում է ոչ միայն ինձ, այլև շատ-շատերին` և հոգեբաններին, և քաղաքագետներին, և ընդհանրապես մարդկանց, որոնք հետաքրքված են հասարակական կյանքով: Տարբեր կարծիքներ եմ լսել, բայց, այնուամենայնիվ, այստեղ, իմ կարծիքով, 3 գործոն է որոշիչ եղել:

Առաջինը` հին-նոր, նաև որոշակի դասակարգային երանգներով, հայաստանցի-ղարաբաղցի, և ոնց որ այդ հին-նորը, հայաստանցի-ղարաբաղցին իրար կպել են զուտ հասկանալի պատճառներով:

Եվս  մեկ հանգամանք՝ նոր պատերազմի վտանգի սարսաափը: Երբ մենք ասում էինք արժանապատիվ խաղաղություն և մեր ժողովրդի մի հատվածը հարմարվել է պարտության հետ, այդ արժանապատիվ խաղաղության մեջ նույնիսկ վտանգ էին տեսնում, որ այս մարդիկ անելու են ինչ-որ քայլեր արժանապատվությունը վերականգնելու համար և այդ քայլերը կարող են վտանգավոր լինել պատերազմը վերսկսելու տեսանկյունից:

Եվ ամենահետաքրքիրը, որ նման սարսափը մեր ժողովրդի գլխին բերած քաղաքական ուժը այդ սարսափի շահառու է դարձել: Սա իսկապես,  թվում է, անտրամաբանական է, բայց սրա մեջ շատ խորը իմաստ կա, սոցիոլոգիայով զբաղվող մարդիկ կտան բացատրություն,  թե ինչպես է այս մեխանիզմներն աշխատում»:

ՀՀ երկրորդ նախագահի խոսքով, իրենց դաշինքի նպատակն եղել է ժողովրդին այս շոկային վիճակից հանելը:

«Մենք դաշինքով մեր ամբողջ քարոզչությանը փորձում էինք հույս, հավատ ներշնչել մարդկանց ապագայի հանդեպ: Նման հույս-հավատ ես չէի տեսնում իշխանական այս թևի մոտ, ուղղակի չկար: Ավելի շատ ներքաղաքական լարվածություն էին հրահրում իրենց մուրճերով, փորձում էին սրել այն գործոնները, որոնք կարող էին աշխատել իրենց օգտին և ինչ-որ չափով իրենց հաջողվեց դա անել»,- ասել է «Հայաստան» դաշիքնի առաջնորդը: