Ձեր վստահելի աղբյուրը

««Հայաստան» դաշինքը 29 մանդատ ունի, բայց պարզ է, որ դաշինքն այդ 29 պատգամավորը չէ։ Խմբակցությունը դա «Հայաստան» դաշինքի ներկայությունն է խորհրդարանում։ Ես դուրս չեմ գալիս «Հայաստան» դաշինքից, մնում եմ այդ դաշիքնի առաջնորդ»,-  Երկիր Մեդիա», «5-րդ ալիք», «Հայկական երկրորդ հեռուստաալիք» հեռուստաընկերություններին տված հարցազրույցում ասել է ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը։

Նա նշել է, որ իրեն երբեք չի համարել օրենսդիրի մարդ, իր սրտով չէր գնալ ու զբաղվել օրենսդրական գործունեությամբ։

«Այս ընթացքում բազմաթիվ հանդիպումներ եմ ունեցել, ամենից հետաքրքիրն այն է, որ այդ հանդիպումների վերջում մարդիկ ցտեսություն ասելուց ասում էին՝ պարոն նախագահ, մի բան խնդրենք՝ չվերցնեք էլի մանդատը։ Եթե 10-ից 9-ն այդպես են արտահայտվում, հասկանում ես, որ քո մտացածը համընկնում է քո քաղաքական թիմի ճնշող մեծամասնության կարծիքի հետ։ Սա պետք էր  հաշվի առնել և ես հաշվի եմ առել։

Թեկուզ ձեռք կբերեի որոշակի անձեռնմխելիություն, բայց դա երկրորդական է և, կարծում եմ, այս որոշումը ճիշտ է։ Արձագանքից տեսնում եմ, որ այլ կարծիք արտահայտողներ գրեթե չկան»,- ասել է «Հայաստան» դաշինքի առաջնորդը։

Նա համոզված է՝ պետք է գնալ խորհրդարան ու ունենալով խորհրդարանական երկրորդ խմբակցությունը՝ «Հայաստան» դաշինքը բավական լուրջ գործիքակազմ է ձեռք բերելու քաղաքական պայքարի համար։  Միաժամանակ նշել է, որ որոշակի ժամանակ է  պետք լինելու ամբողջությամբ մարզավիճակի մեջ մտնելու համար։

Պատասխանելով հարցին, որ ընտրություններից հետո Եվրամիությունը հայտարարել է 3 միլիարդ եվրոյի ներդրում է պատրաստում անել Հայստանում 5 տարում, ԱՄՆ-ն էլ 5 միլիոն եվրոյի գրանտ է պատրատսում, ի՞նչ կասեք Արևմուտքի առատաձեռնության մասին, կա՞ն վտանգներ, Ռ. Քոչարյանն ասել է, որ մի շարք ծրագրեր  ուղղված են  երկրի տնտեսական զարգացմանը, ինչը ողջունելի է, բայց կան ծրագրեր, որոնք ոնց որ ունեն քաղաքական երանգներ։

«Տեսնում եմ, որ այստեղ փորձում են դա ներկայացնել որպես հատուկ վերաբերմունք Հայաստանի նկատմամբ։ Ուղղակի համեմատեք այլ երկրների հետ։ Կարծում եմ՝ այստեղ գործում է ավելի շատ հատուկ վերաբերմունք Ռուսաստանի նկատմամբ  հակառակ պատկերով։ Այն երկրները, որոնք ներգրված են  այդ ծրագրերի մեջ, և այդ գումարների շեշտակի աճը, տպավորություն են թողնում, որ այստեղ կա աշխարհաքաղաքական երանգ»,- նշել է ՀՀ երկրորդ նախագահը։ 

Ռ. Քոչարյանն ասել է, որ Հայաստանը պետք է վերականգնի իր սուբյեկտայնությունը, սակայն դեռ չի տեսում որևէ քայլ ուղղված այդ նպատակին.

«Օրինակ, Սև լճի վերաբերյալ․ Հայաստանում բավական մեծ աղմուկ էր, թե ինչու ՀԱՊԿ-ը, Ռուսաստանը չեն միջամտում այդ խնդրին։ Երբ մեր երկրում Հայաստանի պաշտոնյան ուղղակի հայտարարում է՝ Սև լճի 30 տոկոսի համար հո պատերազմ չենք սկսելու, հիմա, եթե երկրի ղեկավարն այդպես է մտածում, ինչու պետք է այլ կերպ մտածի ՀԱՊԿ-ը կամ Ռուսաստանը, որոնք Սև լճի մասին չեն էլ լսել։

Հիմա ինչու եք այդ խնդիրը գցում ՀԱՊԿ-ի կամ Ռուսաստանի գրպանը։

Ի դեպ, երբ խոսում են տարածքային ամբողջականության մասին, չեն խոսում տարածքային ամբողջականության ինչ-որ տոկոսի մասին՝ եթե 5 տոկոսով է խախտվել, նորմալ է, կամ 1 տոկոսով է, նորմալ է: Կամ կա, կամ չկա, կամ դու կաս քո տարածքային ամբողջականությունը պաշտպանելու գործում, քո սուբյեկտայնությունը հստակ դրսևորելու  գործում, կամ չկաս:

Դու հայտարարում ես՝ պատրաստ չես ոչինչ անել, բայց նաև ուրիշին ասում եք՝ եկեք, իմ տեղն արեք: Ուղղակի աբսուրդ է, նման դրսևորումներով երբեք միջազգային հարաբերություններում դու հարգանքի նշույլ էլ չես ունենա, պրոտոկոլային կբարևեն, կընդունեն, կժպտան, բայց քո մասին այլ կերպ կմտածեն»:

ՀՀ երկրորդ նախագահի խոսքով՝ պետք է մնալ ու պայքարել երկրի համար, երկրի ապագայի համար։

«Դա նույնն է՝ պայքարես քո ընտանիքի, երեխաների, թոռնիկների համար։ Իհարկե, պետք է պայքարենք, կառուցենք այնպիսի երկիր, որտեղ և ապրելու ցանկություն ենք ունենալու, և որով մենք հպարտանալու ենք։ 

Այսօր, ցավոք, հպարտանալու առանձնապես բան չկա, բայց մեր ձեռքում է։ Եթե բոլոր կարող, մտածող մարդիկ այս վիճակից ելնելով պլանավորեն երկիրը լքել, ապա մենք երբեք հրապուրիչ երկիր չենք ունենալու։ 

Մնալ, պայքարել և աշխատել մեր երկրի համար»,- նշել է ՀՀ երկրորդ նախագահ Ռոբերտ Քոչարյանը։ 

Հարցազրույցն ամբողջությամբ՝ տեսանյութում։