Ձեր վստահելի աղբյուրը

Քաջարանում արդեն չորրորդ օրն է ստորագրահավաք է անցկացվում՝ ի աջակցություն համայնքապետ Մանվել Փարամազյանի։

«Ողջունում ենք Ձեզ քաջարանցիներ, քանի որ գիտեմ՝ Ձեր մեջ կա այն ոգին, որը ծնել է Քաջարանի քաջերին։ Ինքս եկել եմ Երևանից, որպեսզի լսելի դարձնեմ Ձեր ձայնը, որպեսզի թնդա ամբողջ հանրապետությունով մեկ»,- ասաց ստորագրահավաքի մասնակիցներից մեկը։

Նրա խոսքով՝ հայտնի է, որ Սյունիքի համայնքապետերն առաջինն են եղել, որոնք սեփական կամքով մեկնել են առաջնագիծ՝ իրենց հետ տանելով իրենց զավակներին։

«Մենք  պատերազմող երկիր ենք, իսկ պատերազմող երկրին անհրաժեշտ է միասնություն, որպեսզի բոլորը ձեռք ձեռքի տված միաբանվեն երկրի պաշտպանության համար։ Բայց այսօր մենք տեսնում ենք Սյունիքը, որի լեռները մեր երկիրը պահող սյուներն են, ուզում են կոտրել։ Նրանք նպատակ ունեն ժողովրդին թևաթափ անել, կոտրելու ժողովրդին, որպեսզի պետք եղած ժամանակ մարդիկ չկարողանան ոտքի կանգնել, որպեսզի պայքար մղեն թշնամու առաջ»,- հայտարարեց ակցիայի մասնակիցը։

Քաջարանի բնակիչ տիկին Գրետան էլ իշխանություններին ուշքի գալու կոչ արեց։

«Խնդրում եմ մեր երկրի իշխաանությանն ուշքի գալ, մեղք են էս ժողովուրդը։ Էն մարդը, որ հոգով սրտով ժողովրդի կողքին կանգնած է, ձերբակալել են։ Ուշքի եկեք, ազատ արձակեք մեր ազատամարտիկներին»,- ասաց նա։ 

Նշենք, որ միաժամանակ ստորագրահավաք է իրականացվում նաև Գորիսում՝ համայնքապետ Առուշ Առուշանյանին ազատ արձակելու պահանջով։ Այս մասին տեղեկացրել էր Առուշանյանի պաշտպանը։