Ձեր վստահելի աղբյուրը

««Պատիվ ունեմ» դաշինքը պատրաստ չէ համագործակցել այս իշխանությունների հետ։ Մենք հստակ լինելու ենք  ընդդիմադիր ուժ»,- Հանրային ՀԸ եթերում Պետրոս Ղազարյանի հետ հարցազրույցում ասել է «Պատիվ ունեմ» դաշինքի առաջնորդ, «Հայրենիք» կուսակցության ղեկավար Արթուր Վանեցյանը:

Դիտարկմանը՝ ԵԽԽՎ-ում, Եվրոպայի խորհրդում ընդդիմություն-իշխանությունը պետք է իրար հետ համագործակցեն և աշխատեն, Ա. Վանեցյանը նշել է. «Եթե հարցը կվերաբերի  Հայաստանի պետական կամ ազգային շահի առաջմղմանը, այո, պատրաստ ենք համագործակցել բոլորի հետ, ոչ միայն իշխանությունների, առհասարակ՝ քաղաքական բոլոր ուժերի հետ»:

Նա նշել է, որ միանշանակ «Պատիվ ունեմ», «Հայաստան» դաշինքները գործելու են ընդդիմադիր դաշտում և լինելու են բնական դաշնակիցներ:

Խոսելով պատերազմի ընթացքում «Հայրենիք» զորախմբի գտնվելու վայրի, մասնավորապես  անդրաառնալով թեմային, թե՞ փախել է «Հայրենիք» զորախումբը արցախյան պատերազմից, թե՞ ոչ,  Արթուր Վանեցյանն ասել է.  «Դա իմ համար, իրոք, շատ ցավոտ թեմա է: Դա իրականության հետ որևէ աղերս չունի: «Հայրենիք» զորախմբի միակ մեղավորությունն է, որ չենք զոհվել: Մենք եղել ենք ամենաթեժ կետերում, մարտնչել ենք ամենաթեժ վայրերում, արել ենք ամեն ինչ և վերջին օրը, երբ եղավ հայտնի հայտարարության ստորագրումը, ես գնացել եմ ՊԲ հրամանատար Միքայել Արզումանյանի մոտ և ասել եմ՝ մենք ուրիշ առաջադրանք ունե՞նք, ասել է՝ ոչ, և վերադարձել ենք Հայաստան, Վարդենիսում հանձնել ենք բոլոր զենքերը, որոնք ստացել էին ՊՆ-ից և վերադարձել ենք Երևան:

Ի՞նչ է նշանակում փախուստ: Ամոթ է, ամոթ»:

Անդրադառնալով հուլիսի 20-ին նույն հաղորդման ժամանակ 1996-2008 թվականներին ընդհատումներով ՀՀ պաշտպանության նախարարի թիկունքի գծով տեղակալ աշխատած Գուրգեն (Գագիկ) Մելքոնյանի արած հայտարարություններին, Ա. Վանեցյանը նախ նշել է, որ  այդ մարդը Հայաստանի ԶՈւ-ի ամենամեծ թալանն իրականացնողի համբավ ունի. «Մարդ, ով ունի բազմաթիվ հանքեր, Անապայում հյուրանոց, ռեստորաններ, դղյակներ՝ ըստ շրջանառվող լուրերի: Թող մի հատ ստուգեն, ապօրինի հարստացման մասին շատ են սկսել խոսել:

Ձեր եթերում ասել է՝ որտեղ են սահմանը պահել:

Մենք եղել ենք Արցախի ՊԲ հրամանատարի ուղիղ ենթակայության ներքո, մեզ ուղարկել են տարբեր ամենադժվար վայրերը, որտեղից ադրբեջանցիները մտնում էին, ինչ-որ մի բան լինում էր, մեզ ուղարկում էին, այսպես ասենք, որպես հատուկ ջոկատ: Նոյեմբերի 5-ին Արայիկ Հարությունյանի խնդրանքով գնացել ենք Ասկերանի շրջանի Շոշ գյուղ, ասում էր՝ մարդ չկա, այդտեղ պետք է պահել, այդ կողմից ադրբեջանցիներն առաջ են գալիս: Գնացել և մինչև վերջին վայրկյանը մնացել ենք Շոշ գյուղում մեր դիրքերում և մինչև այսօր այդ դիրքերը, և Շոշ գյուղը գտնվում են հայկական վերահսկողության տակ:

Իսկ որտե՞ղ է եղել այդ Գագիկ Մելքոնյանը, ո՞ր դիրքերն է պահել պատերազմի ժամանակ: Իմ ունեցած տեղեկություններով՝ Քելբաջարում է եղել, հիմա որտե՞ղ է Քելբաջարը, ո՞ւմ վերահսկողության ներքո է: Մենք ենք փախե՞լ, մենք ենք հանձնե՞լ, թե՞ ինքը»:

Արթուր Վանեցյանը հայտնել է, որ զրպարտության համար հայց է ներկայացվել դատարան Գագիկ Մելքոնյանի դեմ, համոզված է՝ կարճ ժամանակ անց հենց այս հաղորդման ժամանակ նա պետք է հերքի նույն ծավալով, ինչ խոսել է:

«Այպսես կոչված փախուստի հարցը հերքվել է  գլխավոր դատախազության, գլխավոր շտաբի, ՊԲ-ի, ՀՔԾ-ի, քննչական կոմիտեի, ԱԱԾ-ի, տարբեր գեներալների, պատերազմի մասնակիցների կողմից, հերքի է ժողովուրդ, ուղղակի ամոթ է»,- ասել է «Հայրենիք» կուսակցության ղեկավարը: