Պետությունը կրճատում է իր բոլոր անհրաժեշտ ու ոչ անհրաժեշտ ծախսերը՝ սեփական գրպանը լցնելու համար․ Արմինե Ադիբեկյան
«Տեղի ունեցողը գնահատում եմ տրամաբանական, քանի որ այդ խոստումները, ծրագրերը կյանքի են կոչվել 2018թ․-ից, երբ տեղի ունեցավ հանրահայտ վերելակային դիվանագիտությունն ու այդ օրվանից Ալիևը անցավ գործի՝ իրականացնելով իր բոլոր աներևակայելի ու անիրականանալի թվացող իղձերը։ Շնորհիվ ՀՀ ապիկար ու ապազգային քաղաքականության, կապիտուլյացիայի հետևանքով, ռազմական գործողությունների սաբոտաժով, թշնամին մոտեցավ Երևանին, որը կրկին նա համարում է ադրբեջանական քաղաք ու պլանավորում է նաև օկուպացնել Երևանը։ Սա է իրավիճակը և, եթե այսպես շարունակենք, հավանական ապագան»,- ասաց Ադրբեջանի հարցերով փորձագետ Արմինե Ադիբեկյանը՝ անդրադառնալով Երասխի հատվածում ադրբեջանական կողմից հայկական զինված ուժերի ուղղությամբ կրակոցներին, որտեղ ունենք զոհեր, որոնք հաջորդեցին Ալիևի հայտարարություններին։
Խոսելով պատգամավորների ծախսերի դրամավճարը 50 հազարից 250 հազար դարձնելու մասին՝ բանախոսն ասաց, որ կրճատվում է բանակը, 3000 հոգի միայն պաշտպանության նախարարության ու գլխավոր շտաբի անձնակազմից են ազատվելու գործից, ինչը նշանակում է, որ միջին հաշվով 12000 մարդ մնալու է առանց եկամուտի։
«Ես հակված եմ նրան, որ այդ գումարներն ազտվում են նրա համար, որ ապահովեն Փաշինյանի աշխատակազմին ու վարչակազմին։ Կրճատվել են այլ մանր ծախսեր, որոնք ռազմավարական նշանակություն չունեն, բայց այնուամենայնիվ դա փաստ է։ Եթե մինչև այսօր սեփականաշնորհման վկայականները տպվում էին գեղեցիկ թղթի վրա, հիմա ընդհամենը պատճենն են տալիս, քանի որ անգամ այդ թղթի ծախսերը չեն ուզում անեն։ Պետությունը կրճատում է իր բոլոր անհրաժեշտ ու ոչ անհրաժեշտ ծախսերը՝ սեփական գրպանը լցնելու համար, այսինքն լոյալ այդ զանգվածին ապահովելու համար։ Բնական է, որ սահմանամերձ գյուղերը չեն մտնում իրենց պլանների մեջ, քանի որ դրանց պաշտպանությունն ավելորդ ծախսեր են, որոնք նրանք չունեն։ 2021թ․-ից ի վեր Հայաստանը սպառազինություն չի գնում՝ լինելով պատերազմող երկիր, որի տարածքում է արդեն գնում ռազմական գործողություններ»,-ասում է Ադիբեկյանը։
Այն, որ չեն ընկալում հանգամանքը, որ թշնամին արդեն Երևանի դարպասների մոտ է, բանախոսի խոսքերով, ունի մի քանի բացատրություն․ «Առաջինը, այն մարդիկ, որոնք այսօր մեր ճակատագիրն են իշխում, նրանք ադրբեջանցիներին չեն համարում թշնամի, քանի որ տասնամյակներով Թբիլիսիում խորոված-խինկալի ուտելով շատ ուրախ լավ ժամանակ են անցկացրել, նրանք շատ խեղաթյուրված պատկերացում ունեն Ադրբեջանի, նրա քաղաքականության, հայատյացության ու ծրագրերի մասին՝ Հայաստանի ու հայ ժողովրդի վերաբերյալ։ Նրանք չեն ընկալում վտանգը, քանի որ չեն հասկանում, որ իրոք թշնամական, թշնամաբար տրամադրված մարդիկ են զինված մոտենում մեր անզեն ու անպաշտպան գյուղերին»։
Մանրամասները՝ տեսանյութում
