Ձեր վստահելի աղբյուրը

Այսօր մեր խմբակցության 2 պատգամավոր առևանգված են  իշխանության կողմից: Այս մասին Սյունիքի կալանավորված համայնքապետներին ազատ արձակելու պահանջով ստորագրահավաքի ժամանակ ասաց «Հայաստան» դաշինքի անդամ Իշխան Սաղաթելյանը:

«Սա ակնհայտ քաղաքական հետապնդում է՝ օրենքի կոպիտ խախտումով,որի մասին այս իշխանությունը հայտարարել էր նախընտրական շրջանում։ Հիմա փորձում է դա օրը ցերեկով իրականություն դարձնել։ Այս իշխանությունը պետականության, սահմանադրականության, օրինակության հետ որևէ առնչություն չունի»,- հայտարարեց Սաղաթելյանը։

Նրա խոսքով՝ ներկա իշխանությունը նման  գործողություններ իրականացնելիս հետապնդում է երկու նպատակ։

«Նախ Սյունքին ունի ռազմավարական նշանակություն և գիտենք, թե այսօրվա իշխանությունն ինչ մոտեցումներ ունի և ինչ ցավոտ զիջումներ են սպասվում։ Առաջինը այս դիմադրողականությունը ջարդելու հանգամանքը։ Իսկ  երկրորդ, որ վախեցնեն ու քաղաքական հետապնդում իրականացնեն մեր դաշինքի անդամների նկատմամբ»,- ասաց Սաղաթելյանը:

«Հայաստան»  դաշիքնի անդամի կարծիքով ՝ Հայաստանում երբեք նման «բեսպրեդել»,  իրավական խայտառակ իրավիճակ չի եղել։ «Սա այս իշխանության դեմքն է»,- ավելացրեց դաշնակցականը։

Ինչ վերաբերում է խորհրդարանում դաշինքի անելիքներին, ապա Սաղաթելյանն ասաց․

«Գնում ենք խորհրդարան ընդդիմադիր պայքարին նոր ուժ և թափ տալու համար։ Ողջ ուժով պայքարելու ենք այս իշխանությունների դեմ, քանի որ գտնում ենք ,որ նրանք վտանգ են մեր պետության և պետականության համար»։