Ձեր վստահելի աղբյուրը

Ռուսաստանաբնակ երիտասարդ տաղանդավոր դաշնակահարուհի, մի շարք մրցույթների դափնեկիր Եվա Գևորգյանը ելույթ է ունենալու Շոպենի անվան միջազգային մրցույթ

«Այնքան ուրախ եմ, որ ընտրվեցի Շոպենի 18-րդ մրցույթում ելույթ ունենալու համար: Շատ շնորհակալ եմ իմ սիրելի պրոֆեսոր Նատալիա Թրուլին և իմ ընտանիքին և ընկերներին»,- գրել է Եվան ֆեյսբուքյան էջում։ 

Այս տարի հոկտեմբերի 2-23 Վարշավան կդառնա աշխարհի դաշնամուրի մայրաքաղաք, որտեղ տեղի կունենա Ֆրեդերիկ Շոպենի 18-րդ միջազգային դաշնամուրային մրցույթը, որն աշխարհի ամենահին և հեղինակավոր երաժշտական մրցույթներից մեկն է:

18-րդ միջազգային մրցույթի նախնական փուլը կայացել է  հուլիսի 12-23-ը: Մրցել են ամբողջ աշխարհից գրեթե 160 դաշնակահարներ 80 տեղի համար։

Եվան սովորել է Մոսկվայի Պ.Չայկովսկու անվան պետական կոնսերվատորիային կից երաժշտական դպրոցում: Նա նվագում է 3 տարեկանից, մասնակցել է 15-ից ավելի միջազգային մրցույթների և փառատոների` մասնավորապես «Շոպեն» դաշնակահարների մանկապատանեկան միջազգային մրցույթին (Լեհաստան), «Չիտա դի Սան-Դոնա-դի-Պյավե» II միջազգային մրցույթին (Իտալիա), Բակուլովի անվան դաշնակահարների համառուսաստանյան մրցույթին (Եկատերինբուրգ), Clavi Cologne Piano Competition (Գերմանիա) և արժանացել բացառապես առաջին մրցանակների, Cleveland International Piano Competition-ում արժանացել է առաջին մրցանակին։ 2019-ին Cliburn International Junior Piano Competition-ում գրավել է երկրորդ տեղը։

2020-ին Եվա Գևորգյանը Գրան պրի է ստացել Չիկագոյի միջազգային երաժշտական մրցույթում (Chicago International Music Competition), նաև հատուկ մրցանակ ՝ Ֆ․ Շոպենի ստեղծագործության լավագույն կատարման համար։

Եվան 2019-ին ստացել է Հայաստանի քաղաքացիություն։