Ձեր վստահելի աղբյուրը

«Ինքնաբացարկի միջնորդություն ենք ներկայացրել դատարանին մի շարք պատճառաբանություններով և գլխավոր հարցն այն էր, թե ինչպես է այս բողոքը մակագրվել դատավոր Արմեն Դանիելյանին»,-  դատարանի մոտ լրագրողների հետ զրույցում ասաց  Քաջարանի համայնքապետ Մանվել Փարամազյանի պաշտպաններից Լուսինե Սահակյանը:

Հիշեցնենք, որ այսօր Վերաքննիչ դատարանում քննվելու էր  Քաջարանի քաղաքապետ Մանվել Փարամազյանի կալանավորման դեմ պաշտպանի բողոքը:

Պաշտպանի խոսքով, իրենք բարձրացրել են այդ հարցը, ակնկալում էին պատասխան, բայց, բնականաբար, ընդամենն ասել է՝ նախագահն է մակագրել, որևէ  պատճառաբանություն չներկայացրեց, թե ինչ իրավունքով է նախագահն իրեն մակագրել:

«Մեր բարձրաձրած հարցերով մենք հասկացանք, որ այո, մամուլում շրջանառվող այն լուրերը, որ  ԱԱԾ քննչական դեպարտամենտն  առգրավել է դատարանի համակարգիչները, որի միջոցով պետք էր իրականացվեր մակագրումը, նախագահն ինքն է փաստորեն մակագրություն իրականացրել:

Սա  բնականաբար, օրենքով սահմանաված կարգով չէ, քանի որ օրենքը նախատեսում է միայն մեկ դեպք՝  անհաղթահարելի ուժ, որի պայմաններում նախագահն  իրավունք ունի իրականացնելու մակագրություն:

Սա, բնականաբար, չի կարող համարվել անհաղթահարելի ուժ, քանի որ այդ համակարգը շատ արագ հնարավոր էր վերականգնել ու մակագրությունն իրականացվել օրենքով սահմանված կարգով»,- ասաց Լ. Սահակյանը:

Նրա խոսքով, ըստ օրենքի, եթե կա անհաղթահարելի ուժ, ապա նախագահն իրավունք չունի մակագրելու այն դատավորին, որին ինքը կցանականա. «Հստակ սահմանված է, որ ըստ ազգանունների այբենական կարգի է մակագրվում: Եթե այդպես  նայելու լինենք, պետք է մակագրվեր Ազարյանին, ոչ թե Դանիելյանին, կամ մյուս դատավորներին, ովքեր այբենական կարգով նախորդում են Դանիելյանին: Ու անհասկանալի է այս պարագայում՝ ինչպես մակագրվեց վատագույն դատավորին և ոչ թե լավագույն դատավորին, որն առաջին տեղն էր զբաղեցնում մակագրման ցուցակում»:

«Մենք, իհարկե, հարց ենք բարձրացրել, որ սա լրջագույն խնդիր է, որ  գործադիր մարմինը փաստորեն ուղիղ ազդեցություն է գործադրում դատական իշխանության նկատմամբ: Եթե այպես լինի, ապա ոչ մի դժվարություն չկա վարույթ իրականացնող մարմինը, տվյալ պարագայում ԱԱԾ քննչական  դեպտարտամեն է իրականացրել, առգրավի համակարգիչը, ապա իրավիճակ ստեղծի, որ իրենց ցանկությամբ իրականացվի մակագրություն, ինչն իրականացվել է:

Գիտենք Արմեն Դանիելյանն այն դատարավորն է, որը տարիներ շարունակ վատագույն դատավորն է  ճանաչվում, ոչ մեկի համար գաղտնի չէ, որ իշխանության ցանկացած պատվեր իրականացնում է»,- ասաց Մ.Փարամազյանի պաշտպանը:

Ըստ նրա, Արմեն Դանիելյանն այն անձն է, ով կարող է օրինական դատական ակտեր կայացնել, ուղղակի իր մեջ ուժ չի գտնում  քաղաքական գործերով պատվեր չկատարել և դա ակնհայտ է:

Լուսինե Սահակյանն ասաց, որ իրենք խնդրել են դատավորին ինքնաբացարկ հայտնել, իր մեջ ուժ գտնի, գոնե այդպիսի որոշում կայացնի:

«Մենք ներկայացրել ենք նաև Մանվել Փարամազյանի դիրքորոշումը, ով ներկայացրել էր՝ ցանկանում էր, իհարկե, այս բողոքի քննարկմանը մասնակցել, դատարանի առջև իր խոսքն ասել, բայց այն բանից հետո, երբ պարզել է, որ դատավորը Արմեն Դանիելյանն է, քանի որ ձևական բնույթ է կրում այս դատական նիստում  բարձրացված հարցերը, ուստի չի ցանկանում այս դատական նիստին մասնակցել:

Մենք նշել են՝ մենք ևս չենք մասնակցի դատական նսիտին, եթե դատարանը  որոշեց, որ ինքնաբացարկի միջնորդությունը չի բավարարում, այս դատական ստուգումը կիրականացի Արմեն Դանիելյանը»,- ասաց պաշտպանը:

Պաշտպաններից Երվանդ Վարոսյանն նշեց, որ իրենց բողոքը դատարանը մերժելու է, շարունակելու են սպառել ներպետական ատյանները, որպեսզի կարողանա հարցը բարձրացնել եվրոպական դատարանում:

«Այն, որ վերաքննիչ քրեական դատարանի համակարգիչն անհետ կորել է և հին, բայց շատ նոր դատարանի նախագահ Տիգրան Սահակյանը բողոքը մակագրել է Արմեն Դանիելյանին, մեզ համար ամեն ինչ արդեն պարզ է: Արմեն Դանիելյանից ակնկալել դատական պաշտպանություն, անիմաստ է»,- նշեց նա:

Վարոսյանի խոսքով, պարզաբանում չհնչեց, թե ուր է համակարգիչը, ուր են սերվերները. «Նիստին ներկա դատախազն առնվազն ի պաշտոնե պետք է դրա մասի տեղեկություն ունենար, բայց նման տեղեկություն չհայտնվեց: Եթե համակարգիչն ինչ որ մեկն առգրավել է, հափշտակել է կամ ցնդել է, պետք է ապահովել այլ համակարգիչ: Ես ժամանակից առաջ ընկնեմ և ասեմ, որ կտեսնեք՝ ամիսներ շարունակ սա դառնալու է հանցավոր պրակտիկա»:

Հիշեցնենք, որ հուլիսի 10-ին Երևան քաղաքի ընդհանուր իրավասության դատարանի որոշմամբ, դատավոր  Գագիկ Պողոսյան, Քաջարանի համայնքապետ Մանվել Փարամազյանը կալանավորվել է 2 ամսով: Քաջարանի քաղաքապետը Սյունիքի նախկին մարզպետ  Վահե Հակոբյանի հիմնադրած «Վերածնվող Հայաստան» կուսակցության անդամ է։

Մանվել Փարամազյանին մեղադրանք է առաջադրվել ՀՀ քրեական օրենսգրքի 38-178-րդ հոդվածի ({արդախություն կազմակերպել) 3-րդ մասով, 311-րդ հոդվածի (Կաշառք ստանալը) 4-րդ մասով և 154.2-րդ հոդվածի (Ընտրողի կամքի ազատ իրականացմանը խոչընդոտելը) 2-րդ մասով:

Մ.Փարամազյանի պաշտպան Լուսինե Սահակյանը հայտնել է, որ առաջադրված մեղադրանքները Մանվել Փարամազյանը չի ընդունում, գտնում է, որ այս ամենը իր նկատմամբ սանձազերծված քաղաքական հետապնդման շղթայի մի մասն է: