Տաջիկստանի նախագահի քրոջ որդիները դաժանորեն ծեծել են առողջապահության նախարարին՝ կովիդից իրենց մոր մահի պատճառով

Հասարակություն 10:48 27/07/2021 Աշխարհում

Տաջիկստանի նախագահի քրոջ որդիները դաժանորեն ծեծել են առողջապահության նախարարին՝ կովիդից իրենց մոր մահի պատճառով

Տաջիկստանի նախագահ Էմոմալի Ռահմոնի քրոջ երեք որդիները դաժան ծեծի են ենթարկել երկրի առողջապահության նախարարին և այլ պաշտոնյաների՝ COVID-19-ից իրենց մոր մահից հետո։ Այս մասին «rferl» ռադիոկայանին ասել են կառավարությանը մոտ կանգնած աղբյուրները:

Աղբյուրն ասել է, որ հուլիսի 26-ին ՆԳՆ և Առողջապահության նախարարությունների աղբյուրներն հայտնել են, որ Առողջապահության նախարար Ջամոլիդդին Աբդուլլոզոդան, նախագահական բժշկական կենտրոնի ղեկավար Խոլմուհամադ Ռահիմզոդան և մի քանի այլ առողջապահական պաշտոնյաներ և բժիշկներ հարձակման են ենթարկվել:

Նշվում է, որ հուլիսի 20-ին Ռահմոնի 64-ամյա քույրը՝ Կուրբոնբի Ռահմոնովան, մահացել էր կորոնավիրուսից։

Աղբյուրների համաձայն՝ նախարարը և առողջապահության մյուս պաշտոնատար անձինք «ծանր վիրավորվել» են հարձակումներից: Աղբյուրները նշում են նաև, որ Տաջիկստանի իշխանությունները Ռահմոնի քրոջը բուժելու համար հրավիրել են բժշկական փորձագետների՝ Գերմանիայից, Ռուսաստանից և Ուզբեկստանից:

Աղբյուրները նշում են, որ հարձակումների փաստով նախաքննություն է սկսվել:

Աբդուլլոզոդան ներկա չէր Դուշանբեում հուլիսի 26-ին կայացած մամուլի ասուլիսին, որը նվիրված էր Տաջիկստանին COVID-19 պատվաստանյութեր մատակարարելու Վաշինգտոնի քայլին:

Մեկ օր առաջ Տաջիկստանը ստացել էր 1.5 միլիոն դոզա Moderna պատվաստանյութ, որը ԱՄՆ-ն նվիրել էր պատվաստանյութերի բաշխման միջազգային համակարգի միջոցով, որը հայտնի է որպես Covax:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: