Ձեր վստահելի աղբյուրը

Մեղրիի նախկին համայնքապետ Մխիթար Զաքարյանը և Սիսիանի համայնքապետ Արթուր Սարգսյանը պետք է անհապաղ ազատ արձակվեն այն պարզ պատճառով, որ իրենք արդեն ԱԺ պատգամավոր են, ԿԸՀ-ն նրանց տվել է պատգամավորի վկայական: Այս մասին NEWS.am-ի հետ զրույցում նշել է «Հայաստան» դաշինքից ընտրված պատգամավոր, դաշինքի ներկայացուցիչ Արամ Վարդևանյանը:

«Այդ վկայականները և դրանց պատճենը ես երեկ ուղարկել եմ գլխավոր դատախազ Արթուր Դավթյանին՝ ակնկալելով, որ վերջինս ունենալով սահմանադրական պարտականություն հետևելու քրեական գործերի նախաքննության օրինականությանը, այդ օրինականության հսկման պարտականությունից ելնելով կվերականգնի սահմանադրական օրինականությունը՝ վերացնելով կալանքի որոշումը, որովհետև թե՛  Մխիթար Զաքարյանի, թե՛ Արթուր Սարգսյանի մասով չկա ԱԺ-ի համաձայնությունը: Հետևաբար, նրանք անհապաղ պետք է ազատ արձակվեն»,-ասել է Վարդևանյանը:

Նա նշել է, որ երեկ՝ հուլիսի 26-ին իր դիմումը մուտքագրվել է դատախազություն։

«Այն անհապաղ քննության ենթակա հարց է: Այսինքն այստեղ կոնկրետ ժամկետների տրամաբանությամբ պետք չի նայել: Մենք ունենք ակնհայտ Սահմանադրության համապատասխանության հետ խնդիր ունեցող քննություն, մենք ունենք դատախազություն, որի պարտականությունն է հետևել քրգործերով նախաքննության օրինականությանը: Իրենք արդեն գիտեն, որ Արթուր Սարգսյանն ու Մխիթար Զաքարյանն ունեն ԱԺ պատգամավորի կարգավիճակ, և պարտավոր են դրան արձագանքել անհապաղ: Կալանքը պետք է վերացվի»,-ասել է Վարդևանյանը։

Հոդվածն ամբողջությամբ՝ սկզբնաղբյուր կայքում։