Ռուսաստանում Ադրբեջանի դեսպանը կոչ է անում Երևանին «ճանաչել Ադրբեջանի տարածքային ամբողջականությունը»

Քաղաքական 14:59 28/07/2021 Տարածաշրջան

«Բաքուն կոչ է անում Երևանին խաղաղ պայմանագիր ստորագրել, կառուցողական մոտեցում ցուցաբերել սահմանների սահմանազատման խնդրին. Ղարաբաղում պատերազմն ավարտված է»,- Ռիա Նովոստիին տված հարցազրույցում ասել է Մոսկվայում Ադրբեջանի դեսպան Փոլադ Բյուլբյուլօղլին։

«Մեր կողմից մենք բազմիցս հայտարարել ենք, որ պատերազմն ավարտվել է, հակամարտությունն անցյալում է, Հայաստանը պետք է ճանաչի Ադրբեջանի տարածքային ամբողջականությունը, կնքի խաղաղության պայմանագիր և կառուցողական մոտենա սահմանների սահմանազատման խնդրին», - ասել է Բյուլբյուլօղլին։

Բյուլբյուլօղլու խոսքով, Երևանը հետաձգում է Բաքվի հետ հարաբերությունների կարգավորումը:

«Հայկական կողմը կրկին փորձում է հետաձգել միջպետական հարաբերությունների կարգավորման գործընթացը և դրանով իսկ խոչընդոտում է ամբողջ տարածաշրջանի լիարժեք զարգացման նոր պայմանների ստեղծմանը», - ասել է Բյուլբյուլօղլին:

Ինչ վերաբերում է Լեռնային Ղարաբաղում ռուսական խաղաղապահների գտնվելու ժամկետի հետագա երկարաձգման հետ կապված, Բյուլբյուլօղլին ասել է, թե «այսօր, հավանաբար, վաղ է դրա մասին խոսելը»:

Ըստ 2020 թվականի նոյեմբերի 9-ի պայմանագրի, ռուս խաղաղապահ զորախումբը տեղակայված է հինգ տարով:

«Ռուսաստանի Դաշնության խաղաղապահ զորախումբը, որը ժամանակավորապես տեղակայված է Ադրբեջանի Հանրապետության տարածքում, շարունակում է իրականացնել իրեն վերապահված ռազմական և հումանիտար խնդիրները», - ասել է Բյուլբյուլօղլին:

Նշվում է, որ Երևանն ավելի վաղ հայտարարել էր, որ հավատարիմ է Ղարաբաղի վերաբերյալ համաձայնագրերի իրագործմանը, ինչպես նաև աջակցում է ԵԱՀԿ Մինսկի խմբի շրջանակներում բանակցությունների շուտափույթ վերսկսմանը՝ տարածաշրջանի կարգավիճակի խնդիրը լուծելու համար:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: