Կոմունիկացիաների բացման ծրագիրն իրականացնելու համար սահմանի համապատասխան կետերում պիտի ստեղծվեն մաքսային կետեր․ Փաշինյան
«Ի հեճուկս ՀՀ կառավարության ու միջազգային հանրության գործադրած ջանքերի՝ իրադրությունը հայ-ադրբեջանական սահմանագծի երկարությամբ չի կայունանում: Ադրբեջանը շարունակում է ագրեսիվ հռետորաբանության ու գործողությունների գործադրումը, միևնույն ժամանակ անպատասխան թողնելով իրադրության քաղաքական և երկարաժամկետ կարգավորմանն ուղղված միջազգային հանրության բոլոր առաջարկները»,-այսօր կառավարության նիստի մեկնարկին հայտարարեց Նիկոլ Փաշինյանը։
Փաշինյանը, որպես այդպիսին, հիշեցրեց ԵԱՀԿ Մինսկի խմբի համանախագահների ապրիլի 13-ի հայտարարությունը, որով կոչ կողմերին կոչ է արվում, առաջին իսկ հնարավորության դեպքոըմ, վերսկսել բարձր մակարդակի քաղաքական երկխոսությունը՝ համանախագահների հովանու ներքո։ Փաշինյանը հիշեցրեց, որ մինչ օրս Ադրբեջանը չի արձագանքել այս կոչին, իսկ Հայաստանը բազմիցս ընդգծել է իր պատրաստակամությունը՝ ցանկացած պահի սկսելու բանակցային գործընթացը՝ առաջարկվող ֆորմատով։
«Մենք արտահայտել ենք նաև ԵԱՀԿ ՄԽ համանախագահության մանդատից դուրս գտնվող հարցերի վերաբերյալ երկխոսության մեջ լինելու մեր պատրաստակամությունը։ Այդուհանդերձ, Ադրբեջանն իր բոլոր գործողություններով փորձում է խափանել երկխոսության որևէ հնարավորություն՝ հռետորաբանությամբ և գործողություններով վարկաբեկելով նաև նոյեմբերի 9-ի և հունվարի 11-ի եռակողմ հայտարարությունները»,-ասաց Փաշինյանը՝ ընդգծելով, որ Ադրբեջանում շարունակվում են հայ ռազմագերիների, պատանդների ու այլ պահվող անձանց շինծու դատավարությունները, որի հետևանքով նրանք դատապարտվում են երկար տարիների ազատազրկման։
«Հատուկ ուշադրության է արժանի այն փաստը, որ վերջին շրջանում գրեթե բոլոր դատապարտվածները գերեվարվել են նոյեմբերի 9-ից հետո՝ խաղաղապահների պատասխանատվության գոտիներում։ Եթե այս փաստը համադրում ենք այն լայնածավալ հակաքարոզչության հետ, որ Ադրբեջանում վարվում է ընդդեմ խաղաղապահների և այն փաստի հետ, որ Ադրբեջանը մինչև օրս չի ստորագրել խաղաղապահների մանդատը, ակնհայտ է դառնում, որ սա խաղաղապահների, այսինքն՝ Լեռնային Ղարաբաղում կայունության ու խաղաղության դեմ իրականացվող գործողությունների շարք է»,-նշեց Փաշինյանը։
Փաշինյանի խոսքով՝ Ադրբեջանը հետևողական գործողություններ է փեռնարկում նաև վարկաբեկելու կոմունկիացիաների ապաշրջափակման թեման՝ շարունակելով արծարծել ինչ-որ միջանցքի թեմա՝ մատնանշելով կոնկրետ երթուղիներ ու ուղղություններ՝ չնայած որ նման բան չկա ոչ նոյեմբերի 9-ի, ոչ հունվարի 11-ի հայտարարություններում։
«Հայաստանը չի քննարկել, չի քննարկում ու չի քննարկելու միջանցքային տրամաբանության որևէ հարց»,-ասաց Փաշինյանը, հավելելով, որ Ադրբեջանը փորձում է խափանել տարածաշրջանային կոմունիկացիաների թեման, որ ոչ միայն չափազանց կարևոր հարց է մեզ համար, այլև գտնվում է կառավարության առաջնահերթությունների շարքում։
«Տարածաշրջանի բոլոր կոմունիկացիաները պետք է բացվեն, և ինչպես Հայաստանը Ադրբեջանի տարածքով պիտի հաղորդակցություն ունենա դեպի այդ թվում ՌԴ, Կենտրոնական Ասիա ու Իրան, այնպես էլ Ադրբեջանը Հայաստանի տարածքով պիտի հաղորդակցություն ունենա այդ թվում դեպի Նախիջևան, Վրաստան, Իրան։ Այս ծրագիրն իրականացնելու համար սահմանի համապատասխան կետերում պիտի ստեղծվեն մաքսային կետեր, որոնց հատումը երկու կողմերից պետք է իրականացվի միջպետական սահմանների անցման միջազգայնորեն, զորօրինակ, ԱՊՀ-ում ընդունված կանոններին համապատասխան՝ մաքսային, սահմանային և այլ տեսակի հսկողություններով», - ասաց Նիկոլ Փաշինյանը։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
