Ձեր վստահելի աղբյուրը

ԳԱԱ «Օրգանական և դեղագործական քիմիայի գիտատեխնոլոգիական կենտրոն» ՊՈԱԿ-ի աշխատակիցները, գիտաշխատողները, որ այսօր բողոքի ակցիա էին իրականացնում կառավարության շենքի դիմաց, սպասեցին՝ մինչև ԿԳՄՍ նախարարը դուրս գա գործադիր մարմնի նիստից։

Վահրամ Դումանյանին նրանք ներկայացրեցին խնդիրը՝  Օրգանական և դեղագործական քիմիայի գիտատեխնոլոգիական կենտրոնի հետագա գործունեությունը  դրա տարածքում կառուցվելիք շինության հետևանքով վտանգի տակ է։

Նախարարն ասաց՝ պատրաստ է քննարկումների, միայն թե ոչ «այս ֆորմատով»։

«Դուք ակադեմիական ինստիտուտի աշխատակից լինելով՝ կարծում եք ըսենց, միկրոֆոններով,  էսպես կանգնած քննչական կոմիտեի եզրակացություն քննարկե՞նք»,-ասաց Դումանյանը։

Ինստիտուտի աշխատակիցներն արձագանքեցին. «Եթե ինստիտուտի ապագան վտանգված է...»։

Դումանյանը  նրանց խոսքը կիսատ թողեց, ասաց՝ վտանգված չէ, ինքն էլ ակադեմիական ոլորտի ներկայացուցիչ է։

«Ինստիտուտի ապագան պետք չի կապել ինստիտուտի պրոֆեսիոնալ գործունեության հետ չառնչվող, միգուցե ձեզ համար տհաճ, միգուցե ինձ համար տհաճ երևույթի հետ։ Մի անհանգստացեք, ինստիտուտը չի փակվի, աշխատեք, ավելի լավ արդյունքներ ստացեք, ավելի լավ հրապարակումներ արեք, փորձեր դրեք, և այլն, և այլն։ Պետք չի կապել դա դրանք գիտական գործունեությունից դուրս հարցերի հետ։ Դուք ասում եք, եթե բասեինը չլինի, ինստիտուտը կփակվի»,-ասաց Դումանյանը։

Ինստիտուտի աշխատակիցներից մեկն ընդհատեց  նախարարին. «Ուրիշ բաներ մի ասեք էլի»։

Նախարարն ասաց՝ հրավիրում է ինստիտուտի աշխատակիցներին իր մոտ քննարկման։
Մնջոյանի անվան նուրբ օրգանական քիմիայի ինստիտուտի տնօրեն Վիգեն Թոփուզյանը հակադարձեց՝ երեք օր առաջ ցանկանում էին իր մոտ գալ, սակայն ամեն կերպ խուսանավեցին։

«Ուզում ենք Ձեզ տեղյակ պահել, որ անգամ Ձեզ մոտ գալը պրոբլեմ է»,-ասաց պրոֆեսոր
Վիգեն Թոփուզյան։

«Ի՞նչ է նշանակում «Ձեզ մոտ գալը պրոբլեմ է»։ Ուրեմն Կամերայինի  կոլեկտիվին գալը պրոբլեմ չի...»,-վրա բերեց նախարարը։
«Ես չգիտեմ, ոնց է վարվում Կամերայինի կոլեկտիվը։ Մենք քաղաքավարի զանգում ենք, մեզ չեն պատասխանում»,-արձագանքեց պրոֆեսորը։
«Մի րոպե, եկեք զուգահեռ չխոսենք, կներեք, Դուք որպես ի՞նչ եք աշխատում ինստիտուտում»,-հարցրեց ոլորտի պատասխանատուն։
«Ես Մնջոյանի ինստիտուտի տնօրենն եմ»,-ներկայացավ գիտնականը։
«Ըհը, ոնց որ ինստիտուտում սեմինարներին հարց եք քննարկում, օրինակ սեմինար անում եք, չէ՞, հուսով եմ։ Բայց ըսենց քննարկում-սեմինար ո՞նց է ձեզ համար»,-ասաց Դումանյանը։
«Դուք եք ստիպել»,-պատասխանեց ինստիտուտի տնօրենը։
«Ե՞ս»,-զարմացած հարցրեց նախարարը։
«Այո, կոնկրետ ես երեք օր առաջ փորձել եմ, դուրս գալ Ձեզ վրա, ժամադրություն խնդրել, որպեսզի գամ, այս հարցը քննարկեմ։ Չեմ կարողացել Ձեզ միանալ»,-ներկայացրեց Թոփուզյանը։
«Դուք ի՞նչ եք կարծում, առաջին իսկ փորձից պետք է դա իրականություն դառնար։ Երեք օր առաջ դա անհնար էր, տեղում չեմ եղել, այլ գործերով եմ եղել»,-ասաց նախարարը։
«Բայց կարելի՞ էր չէ, ասել, օրինակ, վաղը չէ մյուս օրը համեցեք... երբ ձեզ համար է»,-պատասխանեց պրոֆեսորը։
«Ձեզ ի՞նչ է թվում, եթե ես խուսափեի հանդիպումից, հիմա էլ կխուսափեի։ Ու ձեզ չթվա, որ դուք ինձ պարտադրել եք այս հանդիպումը։ Հրավիրում եմ ինձ մոտ նորմալ զրույցի։ Հենց հիմա, 3-4 հոգուց ոչ ավելի, բայց առանց լրագրողների։ Ես ձեզ զարմանում եմ՝ ասում եմ, եկեք քննարկենք, դուք ուրիշ բաներից եք խոսում, 4-5 հոգով, անունները կտաք ներքևում, կբարձրանաք, կոնստրուկտիվ օրակարգ բերեք, որ քննարկենք»,-ասաց Դումանյանը։