Ձեր վստահելի աղբյուրը

ԱՄՆ նախագահ Ջո Բայդենը նոր միջոցներ է ներկայացրել կորոնավիրուսի համաճարակի դեմ պայքարելու համար: ԱՄՆ-ի բոլոր դաշնային քաղաքացիական ծառայողները պարտավոր են պատվաստվել COVID-19-ի դեմ կամ պարբերաբար հետազոտվել: Բացի այդ, Միացյալ Նահանգների վարչակազմը մտադիր է մասնավոր հատվածի գործատուներին հորդորել հետևել այդ օրինակին: Այս մասին գրում է Euronews-ը։

«Այսօր ես նախանշում եմ լրացուցիչ քայլերը, որոնք մենք պետք է ձեռնարկենք, որպեսզի այս փրկարար պատվաստանյութերը փոխանցենք ավելի շատ ամերիկացիների: Նախ, մենք ավելի շատ խթաններ ենք տրամադրելու չպատվաստված ամերիկացիներին՝ պատվաստումներ կատարելու համար:

Դաշնային կառավարության յուրաքանչյուր աշխատակից պարտավոր կլինի ներկայացնել պատվաստման կարգավիճակը: Յուրաքանչյուր ոք, ով չի հաստատում դա կամ ով չի պատվաստվել, կպահանջվի դիմակ կրել՝ անկախ նրանից, թե որտեղ է նա աշխատում: Շաբաթը մեկ կամ երկու անգամ նրանք կանցնեն թեստեր՝ ստուգելու, թե արդյոք վարակվել են կորոնավիրուսով: Բացի այդ, նրանք ստիպված կլինեն պահպանել սոցիալական հեռավորության կանոնները և նրանց թույլ չեն տա մեկնել գործուղումների»,-ասել է ԱՄՆ նախագահ Բայդենը։

ԱՄՆ-ում կա ավելի քան 4 միլիոն դաշնային կառավարության աշխատակից: Նրանցից ավելի քան 2 միլիոնն աշխատում են ինչպես ԱՄՆ-ում, այնպես էլ այլ երկրներում: Նախորդ օրը Միացյալ Նահանգների պաշտպանության նախարարությունը ներկայացրեց պահանջ՝ զինվորական և քաղաքացիական անձնակազմին պատվաստել կորոնավիրուսի դեմ կամ վարակի համար պարբերաբար թեստավորել: