Ձեր վստահելի աղբյուրը

«Գրանցվել է 71 պատգամավոր, քվորում ունենք»,-ասաց ԱԺ փոխնախագահ Ալեն Սիմոյանը՝ հայտարարելով Ազգային ժողովի արտահերթ նստաշրջանի մեկնարկի մասին։

Նստաշրջանի օրակարգում  ընդգրկված է նաև «Պետական սահմանի մասին» օրենքում լրացումներ կատարելու մասին նախագիծը։

«Պետական սահմանի մասին» 2001 թվականի նոյեմբերի 20-ի ՀՕ265 օրենքի 22¹ -րդ հոդվածի 1-ին մասի «զ» ենթակետը «թույլտվության» բառից հետո լրացնել «օգտագործել անօդաչու թռչող սարքեր, տեսալուսանկարահանել սահմանակից պետության տարածքը, սահմանային շերտում տեղակայված ինժեներական կառույցները և արգելափակոցները, սահմանապահ զորքերի կողմից օգտագործվող շենքերը, շինությունները, դիտաշտարակները, տրանսպորտային միջոցները,» բառերով:

Հոդված 2. Սույն օրենքն ուժի մեջ է մտնում պաշտոնական հրապարակման օրվան հաջորդող տասներորդ օրը:

Նշենք, որ «Պետական սահմանի մասին» ՀՀ օրենքի 22¹ հոդվածը վերաբերում է Սահմանային շերտ մուտք գործած անձանց վրա տարածվող սահմանափակումներին՝ կետերով մանրամսնելով, թե ինչ է արգելվում։

Նշվում է, որ սահմանային շերտ մուտք գործած անձանց արգելվում է.

զ) զբաղվել որսորդությամբ, արդյունագործական ձկնորսությամբ, բնափայտի մթերմամբ (բացառությամբ քաղաքացիներին սեփականության իրավունքով կամ վարձակալությամբ պատկանող այգիներում իրականացվող սանիտարական մաքրումների և ծառահատումների), վնասել կամ ոչնչացնել բուսականությունը (բացառությամբ քաղաքացիներին սեփականության իրավունքով կամ վարձակալությամբ պատկանող հողատարածքներում խոտհունձ կատարելու), սահմանապահ զորքերին պատկանող գույքը, առանց համապատասխան թույլտվության զբաղվել հողերի, ջրային ռեսուրսների, անտառների օգտագործումով, երկրաբանական և հնէաբանական հետազոտություններով, լեռնային գործով, հիդրոկառույցների շինարարությամբ (բացառությամբ այն հիդրոկառույցների, որոնց ստեղծումը բխում է Հայաստանի Հանրապետության միջազգային պայմանագրերի պահանջներից)։