Ձեր վստահելի աղբյուրը

«Ժողովուրդ» թերթը գրում է. «Հայաստանում գազաբալոններով մեքենաների վարորդները պարտավոր կլինեն ունենալ դրանց շահագործման լիցենզիա: «Ժողովուրդ» օրաթերթը տեղեկացավ, որ կներդրվի տնտեսվարողների պարտադիր լիցենզավորում, որոնք զբաղվում են գազաբալոնների տեղադրմամբ: Հայաստանի իշխանությունները վերջապես սկսել են զբաղվել սեղմված բնական և հեղուկ գազով շահագործվող ավտոմեքենաների վրա գազաբալոնային սարքերի տեղադրման ոլորտով:

Ավելին՝ մեզ հայտնի դարձավ, որ կսահմանվի սեղմված բնական և հեղուկ գազով աշխատելու համար ավտոմեքենաների վրա գազաբալոնային սարքավորումների տեղադրման և բալոնների պարբերական վկայագրման կարգը:

Այս մասին որոշման նախագիծը Տարածքային կառավարման և ենթակառուցվածքների նախարարությունը երեկ է շրջանառության մեջ դրել: Ի դեպ, գազալիցքավորման կայաններն իրավունք չեն ունենա բալոնները լիցքավորել առանց վկայականի, ինչպես նաև այն դեպքում, եթե այն ժամկետանց է, քանի որ այն կարող են ստուգել էլեկտրոնային բազայում:

Իսկ բալոնների՝ սահմանված պահանջներին չհամապատասխանելու դեպքում դրանց օգտագործումը կարգելվի: Խախտողներին կսպառնա վարչական տույժ:»։
Մանրամասները թերթի այսօրվա համարում