Ձեր վստահելի աղբյուրը

«Իզմիրլյան» ԲԿ տնօրեն, «Հայաստան» խմբակցության պատգամավոր Արմեն Չարչյանին հետաքրքրում է՝ քրեակատարողական հիմնարկում անհրաժեշտ բուժօգնություն ստանո՞ւմ է  իր գործընկեր, Մեղրիի նախկին քաղաքապետ Մխիթար Զաքարյանը, որ վիրավորում էր ստացել Արցախի 44-օրյա պատերազմի ընթացքում։

Այս ու մի քանի այլ հարցեր նա ուղղեց խմբակցության քարտուղար Արծվիկ Մինասյանին, որ ամբիոնի մոտ էր ու պատասխանում էր իրեն հասցեագված հարցերին։

«Պարոն Չարչյան, Դուք որ անցել եք այդ փորձության միջով, ինչպես նաև այստեղ նստած մեր ընկերներից շատերը, շատ լավ են հասկանում անազատության մեջ գտնվելու՝ ոչ միայն հոգեբանական, այլև առողջական խնդիրները»,-արձագանքեց Մինասյանը։

Նրա խոսքով, անազատության մեջ գտնվող պատգամավորների նկատմամբ այնպիսի սահմանափակումներ են կիրառվում, որ ԱԺ պատգամավոր Աննա Գրիգորյանին արգելել են այցելել նրան։

«Սա է այս իշխանության իրական կերպարը, որ նույնիսկ ԱԺ պատգամավորին, որն ունի ՔԿՀ այցելելու սահմանադրական մանդատ, արգելում են առանց հիմնավորման»,-ասաց Մինասյանը։

Չարչյանը շարունակեց՝ կա՞ հնարավորություն ճշտելու Սյունիքի մարզի  անազատության մեջ գտնվող համայնքապետերի ու պատգամավորների առողջական վիճակը, դիմենք նախագահողին, որպեսզի նրանց օգնություն ցուցաբերվի։

«Լինելով բարձրագույն մարմին՝ մեր կրավորական դիրքը պետք է շարունակե՞նք, թե՞ ինչ որ գործողություններ պետք է ձեռարկենք»,-հարց հնչեցրեց ընդդիմադիր պատգամավորը։

Մինասյանը հույս հայտնեց, որ Չարչյանի հարցը լսելի է թե իշխող ուժի պատգամավորներին, թե նիստը նախագահողին։

«Չկրկնվեմ, բայց դա մեր պարտականությունն է։ Իշխանությունը պետք է ունենա այդ պարտականության ընկալելու, գիտակցելու կարողությունը, և քայլեր ձեռնարկի»,-նշեց ընդդիմադիր խմբակցության քարտուղարը։

Նա ընդգծեց, եթե Մխիթար Զաքարյանն ու Արթուր Սարգսյանն ԱԺ ամբիոնից չներկայացան, ապա դա պետք է գնահատվի ոչ միայն Սահմանդրությամբ ամրագրված ընտրելու ու ընտրվելու իրավունքի խախտում, սահմանադրական կարգի խախտում, այլև մարդկանց առողջության դեմ ուղղված գործողություններ։

Նույն խմբակցությունից Էլինար Վարդանյանն էլ արձագանքեց Գլխավոր դատախազության տարածած հայտարարությանը, ըստ որի, ԱԺ թեկնածուներն ազատությունից զրկվել են «ՀՀ ընտրական օրենսգիրք» սահմանադրական օրենքի 90-րդ հոդվածով սահմանված երաշխիքի պահպանմամբ, այն  է՝ ՀՀ Կենտրոնական ընտրական հանձնաժողովի համաձայնությամբ։

«Նրանք ոչ թե ԱԺ պատգամավորի թեկնածուներ են, այլ ԱԺ պատգամավորներ։ Այս ի»նչ մտքեր եք արտահայտում։ Իրավագիտությունից հեռու էս ի՞նչ մեկնաբանություններ եք անում»,-ասաց նա։

Աժ-ում հնչեցված այն մտքին, թե ԱԺ գործառությների մեջ չի մտնում պատգամավորների ազատ արձակումը պահանջելը, Էլինար Վարդանյանը նկատեց՝ այսինքն, ԱԺ գործառույթների մեջ չի՞ մտնում պահանջել Սահմանդրության ու ԱԺ կանոնակարգ օրենքի դրույթների պահպանումը։
«Բա ո՞րն է մտնում ԱԺ գործառույթների մեջ։ ԱԺ  գործառույթների մեջ չի՞ մտնում նաև այն, որ այսօր Ադրբեջանում մեր երկու հայրենակիցներին դատապարտեցին 20 տարվա ազատազրկման էլի ձեր լուռ համաձայնության ներքո։ Մեկ շաբաթ առաջ ևս երկուսին 15 տարվա ազատազրկման էին դատապարտել։ Բա ո՞ւր կորավ ժողովրդավարության բաստիոնը»,-ասաց նա։

Էլինար Վարդանյանը նաև մի հարց ուղղեց Արծվիկ Մինասյանին, եթե իր կամքից անկախ ԱԺ պատգամավորները չեն կարողանում ներկայանալ ԱԺ, այդ պարագայում ԱԺ մարմինների ձևավորումը կարո՞ղ է համարվել օրինական, թե՞ ոչ։

Մինասյանը նախ հայտարարեց՝ զորակցություն են հայտնում գերության մեջ գտնվող հայրենակիցներին ու վճռականությունը, որ ամեն ջանք ու հնարավորություն օգտագործելու են օր առաջ նրանց հայրենիք վերադարձնելու համար։

«Սրանում մեր ընտրողները պետք է համոզված ու վստահ լինեն»,-ասաց Մինասյանը։
Ինչ վերաբերում է դատախազության տարածած հաղորդագրությանը, ապա Մինասյանը, օգտագործած բառապաշարն անթույլատրելի համարեց։

«Երևում է դատախազությունը դեռ չի հանդիպել պառլամենտում ներկայացված այնպիսի քաղաքական ուժի, որ իրենց կկանչի պատասխանատվության։ Այս ամբիոն պետք է գա դատախազն ու հլու հնազանադ պատասխանի հարցերին»,-ասաց Մինասյանը՝ դատախազության իրավական հիմնավորումը որակելով իրավական անգրագիտության գոհար ու ԱԺ-ին, Սահմանդրության նկատմամբ արհամարհանք։

Մինասյանն ասաց, եթե անազատության մեջ գտնվող իրենց գործընկերները չներկայանան ԱԺ, ապա ընտրական գործընթացը կլինի ոչ օրինական, իսկ իրենք դրա մասնակից չեն լինի։