Ձեր վստահելի աղբյուրը

Թուրքիայի նախագահի հաղորդակցության տնօրեն Ֆահրեթին Ալթունը կարծում է, թե Թուրքիայում հրդեհների ֆոնին երկրին առաջարկվող օգնությունը Թուրքիային վարկաբեկելու նպատակ ունի։ 

«Այսպես կոչված օգնության արշավը, որը կազմակերպվել է դրսից և մեկ կենտրոնից, մեկնարկել է գաղափարական դրդապատճառներով՝ ցույց տալու մեր պետությունը անգործունակ և թուլացնելու մեր պետություն-ազգ միասնությունը»,- թվիթերում գրել է Ալթունը։

Ալթունն իր գրառման մեջ նշել է, որ Թուրքիան անտառային հրդեհների դեմ պայքարը շարունակում է՝ պետության բոլոր միջոցների մոբիլիզացմամբ:

Հիշեցնելով, որ 35 նահանգներում 129 հրդեհներից 122-ը վերահսկողության տակ են վերցվել, Ալթունն ասել է, «մեր Թուրքիան ուժեղ է: Մեր պետությունը կանգուն է: Ինչպես ասել է մեր նախագահը, մենք փոխհատուցելու ենք մեր բոլոր կորուստները, բացի կորցրած կյանքերից, և հանգցնելու ենք այս կրակը, որը այրում է մեզ»:

Նշենք, որ վերջին տվյալներով Թուրքիայում հրդեհի զոհ է դարձել 8 մարդ։