Մենք չենք եկել խորհրդարան, որ միայն զբաղվենք հլու-հնազանդ ինչ-որ գործունեությամբ․ Արմեն Ռուստամյան
«Ազգային Ժողովն իր առաջին նիստում հաստատում է, որ այդ անձինք պատգամավոր են, բայց պատգամավորի լիազորությունները կասեցնում են ըստ էության։ Սա, բնականաբար, աննորմալ վիճակ է։ Հիմա մենք Սահմանադրական դատարանից պահանջելու ենք այս պարզ հարցի պատասխանը, այն, ինչն անհեթեթ կերպով դատախազությունն է իբրև թե մեկնաբանում, որ անձեռնմխելիությունը հաղթահարել է Կենտրոնական ընտրական հանձնաժողովը։ Պատգամավորի անձեռնմխելիությունը կարող է հաղթահարել միայն ԱԺ-ն»,-այս մասին Ազգային ժողովում ասաց Հայաստան դաշինքի պատգամավոր, դաշնակցական Արմեն Ռուստամյանը՝ խոսելով ԱԺ 8-րդ գումարման առաջին նստաշրջանին «Հայաստան» դաշինքի պատգամավորներ Մխիթար Զաքարյանի և Արթուր Սարգսյանի կալանքի տակ գտնվելուն:
Ռուստամյանի խոսքերով, ինչ-որ անհայտ գերատեսչության կողմից որոշվել է, որ պատգամավորը կարող է անձեռնմխելիությունից զրկվել առանց ԱԺ-ի, հավելելով, որ դատախազությունն ԱԺ-ից բխող մարմին է։
«ՍԴ-ն պետք է հարցին մոտենա իրավական տեսանկյունից, ունիվերսալ ճշմարտություններն իմանալու ու դրա վրա հենվելու տեսանկյունից ու, կարծում եմ, հանրության համար էլ օգտակար կլինի հասկանալ, ի վերջո, այստեղ կատարվել է կամայականություն, թե ոչ։ Եթե սա չկանխենք, սա կշարունակվի»,-ասաց Ռուստամյանը։
ՍԴ դիմելու հետ կապված Ռուստամյանն ասաց, որ այսօրվանից սկսելու են ստորագրահավաք, հավելելով, որ կալանքի տակ գտնվող իրենց պատգամավորները քաղբանտարկյալներ են։
Պատասխանելով Իշխան Սաղաթելյանին ԱԺ փոխնախագահի պաշտոնում առաջադրելու, այլ ոչ թե փորձառու որևէ մեկին հարցին, Ռուստամյանն ասաց, որ նպատակահարմար են համարել հենց Սաղաթելյանին, որը, նրա խոսքերով, եղել է Հայրենիքի փրկության շարժման առաջատար դեմքերից մեկը։
«Մենք չենք եկել խորհրդարան, որ միայն զբաղվենք հլու-հնազանդ ինչ-որ գործունեությամբ, օրենսդրական խնդիրներով։ Պարզ է, որ ունենք լուրջ հակադրություն իշխանությունների հետ ու այդ հակադրության առարկան շատ էական է․ մեր պետության տեսլականի մասին է խոսքը։ Մեր խորին համոզմամբ, այս իշխանություններն ուզում են մի պետություն, որն ուղղակի հրաժարվում է սերունդների առաքելությունից՝ պաշտպանել մեր կենսական շահերը ու ապահովել այստեղ մեր նվաստացած գոյությունը։ Մեր մոտեցումն այն է, որ արժանապատիվ կյանք և ապրելու հնարավորություն ապահովվի»,-ասում է Արմեն Ռուստամյանը։
Իշխանությունների հետ կառուցողականության մասին խոսք լինել չի կարող, քանի որ, Ռուսատամյանի խոսքերով, իրենք տարբեր նպատակներ են հետապնդում։
«Ազգային Ժողովում հանձնաժողովների հարցը նախատեսված է Դոնթի բանաձևով։ 3-րդ և 6-րդ ընտրությունը մերն է։ Ըստ էության, մենք մի տեղ, կարծում եմ կպայմանավորվենք Պատիվ ունեմ դաշինքին մեր քվոտայից առանձնացնենք։ Այսինքն, եթե 12 հանձնաժողով է որոշվում, 12-ի մեջ 3 նախագահի պաշտոն վերապահվում է ընդդիմությանը»,-այս մասին ԱԺ-ում ասաց Հայաստան դաշինքի պատգամավոր, դաշնակցական Արմեն Ռուստամյանը, հավելելով, որ իշխանության հետ հանձնաժողովների հետ կապված ոչ մի ներքին պայմանավորվածություն չկա։
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
