Ձեր վստահելի աղբյուրը

«Պարո՛ն Արշակյան, ճիշտ ասացիք՝ միակ երկիրը չենք, որ պատերազմ ունենք, բաց միակ երկիրն ենք, որ պատերազմի արդյունքում, պարտություն կրելուց հետո, իշխանությունն իր վրա քաղաքական պատասխանատվության բեռ չի վերցնում և չի թողնում քաղաքական իշխանությունը կամ հրապարակը»,-խորհրդարանում հայտարարեց «Հայաստան» դաշինքի պատգամավոր Գեղամ Մանուկյանը:

Անդրադառնալով ընտրություններում հայրենի գյուղում Իշխան Սաղաթելյանի պարտվելու  և իշխող ուժի՝ ժողովրդի քվեն ստանալու մասին հայտարարությանը, Գեղամ Մանուկյանը հիշեցրեց, որ  2017 թվականին Սաղաթելյանն իր գյուղում հաղթել էր, իսկ Նիկոլ Փաշինյանի գլխավորած «Ելք» դաշինքը հավաքել էր 16 ձայն:

Պատգամավորը նկատեց, որ 2018 թվականին արդեն աննախադեպ բարձր տոկոս էր հավաքել «Իմ քայլը» և  հայտնեց, թե չգիտի, թե այդ մի քանի ամսում մարդկանց գիտակցության, քաղաքական հայացքների մեջ ի՞նչ է փոխվել և ենթադրեց, որ «ժամանակներն են ազդում քվեների վրա»:

Գեղամ Մանուկյանը նշեց, որ այս ընտրություններում Սաղաթելյանը ստացել է գյուղի ընտրողների 48 %-ը, իսկ 2018 թվականին նա հաղթել էր՝ ստանալով 80 %, ինչի մասին շտապել էին զեկուցել Նիկոլ Փաշինյանին:

Պատգամավորը հիշեցրեց նաև, որ իրեն տված հարցազրույցներից մեկում Ռոբերտ Քոչարյանն ասել է, թե շատ վտանգավոր է, որ «մեր երկրի պետական կառավարման համակարգում բացակայի ինստիտուցիոնալ հիշողությունը», և նկատեց, որ 2018-ին այն շատ կարևոր էր, քանի որ իշխանության էին եկել անփորձները և վարչության պետերի մակարդակով պետական համակարգն էր պահպանվում... Հետո շատ ավելի վատ եղավ, քանի որ վարչության պետերից շատերին էլ հեռացրին:

Նկատելով, որ քաղաքական ինստիտուցիոնալ հիշողությունը նույնպես շատ կարևոր է՝ Մանուկյանը  շեշտեց, որ շատերին թվում է, թե մարդիկ հիշողություն չունեն և դիմեց իմքայլական Գևորգ Պապոյանին.  «Երբ որ հայտարարում եք 248 մլն դոլարի զենք եք գնել, ուզում եմ հարցնել՝ այն ինքնաթիռների արժեքը դրա մեջ մտնո՞ւմ է, նրանց աքսեսուարները վերջապես հասա՞ն տեղ»:

«Հայաստան» դաշինքի անդամը հայտարարեց, որ տնտեսագետ չէ և դատում է իր դիմացի հարևան՝ տիկին Ալլայի ցուցանիշներով:

«Նա անցած տարի ձեթը գնում էր 650 դրամով, հիմա՝ 1350 դրամով։ Դե եկեք Ալլային բացատրեք, որ 5.3 %, 7.8% , Քերոբյանի ասած աննախադեպ՝ երկնիշ թվերով աճ եք ապահովել»,- հայտարարեց Մանուկյանը:

Նրա խոսքով՝ երբ Գևորգ Պապոյանը «մարտի 1»-ից է խոսում, իր սիրտը մեկ-մեկ կանգնում է:
«Հիմա կարող եք ասել որ ֆիկտիվ հանրապետական եք եղել, բայց կրծքանշանը դոշին ֆիկտիվ հանրապետականը ո՞րն է, հանրապետականի դրոշը ձեռքին ֆիկտիվ հանրապետականը ո՞րն է, թե ճիշտ են այն խոսակցությունները, որ 2008-ին Լևոն Տեր-Պետրոսյանի տան դիմաց նստացույցի էիք մասնակցում»,-ասաց Գեղամ Մանուկլյանը՝ ակնարկելով, որ Գևորգ Պապոյանն այն տարիներին եղել է ՀՀԿ անդամ:

Անդրադառնալով Հակոբ Արշակյանի ելույթի ժամանակ հնչեցրած այն մտքին, ըստ որի Թուրքիան մասնակցել է արցախյան Պատերազմին՝ Գեղամ Մանուկյանը հարց բարձրացրեց, թե մինչև Պատերազմն արդյո՞ք իշխանությունները գիտակցել են այդ մասին և մեջբերեց 2021 հուլիսի 27-ին հնչեցված հայտարարությունը. «Սեփական զինված ուժերի անզորությունը հստակ գնահատելով՝ Ադրբեջանի իշխանություններն անում են առավելալգույնը, որպեսզի Թուրքիան ներգրավվի այս կոնֆլիկտին, կարծում եմ, որ Թուրքին չի գնա նման քայլի և որևէ կերպ չի հանդիսանա կողմ»։

Մանուկյանը նաև հիեցրեց, որ դրանք Լիլիթ Մակունցի խոսքերն են, որը նախորդ օրը, չունենալով դիվանագիտական աշխատանքի փորձ, նշանակվել է ԱՄՆ-ում ՀՀ դեսպան:

Ի դեպ՝ նույնը նաև սեպտեմբրի 11-ին հայտարարել էր իմքայլական նախկին պատգամավոր Տաթևիկ Հայրապետյանը:

Նկատելով, որ սեպտեմբերին իշխանությունները բացառում էին Թուրքիայի մասնակցությունը, բայց սեպտեմբերի 27-ին նա մասնակցեց հակամարտությանը՝ Մանուկյանը հարցրեց՝ «Ո՞վ է դրա պատասխանատուն»:

Նրա խոսքով՝ Արցախյան առաջին պատերազմում Թուրքիան միշտ էլ ցանկացել էր մասնակցել, սակայն դիվանագիտական միջոցներով կանխվել էր այն:

«Երեք տարվա քաղաքականության արդյունքում Թուրքիային բերեցիք նստեցրեցիք Շուշիում, Ակնայում, որը հիմա անվանում են Աղդամ»,-հայտարարեց Գեղամ Մանուկյանը: