Ձեր վստահելի աղբյուրը

«Շինարարության մեջ քանդող բրիգադները բավականին հեշտ են լուծում իրենց խնդիրը, կառուցողների խնդիրն է բարդ»,-ԱԺ ամբիոնից հայտարարեց «Հայաստան» խմբակցության պատգամավոր Արթուր Ղազինյանը՝ անդրադառնալով արդեն երեք օր իշխանության կողմից հնչեց կառուցողական մթնոլորտ ստեղծելուն ու այդ պայմաններում աշխատելուն։

Նա մանրամասնեց, կառուցողի խնդիրը բարդ է, քանի որ կառուցելու համար պետք է ունենալ գիտելիք, կրթություն, գաղափար, ստեղծագործել, արտադրել։

«Մինչդեռ վերջին երեք տարվա ընթացքում իրականում բավական մեծ դաշտ կար ինչ-որ բան կառուցելու, կար մանդատ՝ շատ ավելի պողպատե, քան այսօր, շատ ավելի ամուր և լեգիտիմ, չկար պատերազմ։ Կարելի էր անել բավականին լուրջ բարեփոխումներ, բավականին լուրջ գիտնականներ ցանկանում էին օգնել պետությանը, բայց ինչպես ասում են՝ ունեցանք այն, ինչ ունեցանք»,-ասաց Ղազինյանը։

Նա նշեց, որ այս իշխանությունում ճանաչում են մեկ մարմին՝ Նիկոլ Փաշինյանին, ում ժողովրդի մի ստվար զանգված ձայն է տվել։

«Հետևաբար, ես ակնկալում եմ կառուցելու գաղափարով նա առաջիկայում կլինի այս ամբիոնի մոտ, հանդես կգա կոնկրետ առաջարկությունով, կներկայացնի իր տեսլականը որպես կառավարության ղեկավար, թե ինչպես է պատկերացնում  երկրի ապագան, դրանից հետո կհասկանանք, կառուցելու ցանկություն կա՞, կա՞ բավարար ներուժ դրա համար, թե՞ ոչ»,-ասաց Ղազինյանը։

Ի դեպ, ընդդմադիր պատգամավորը կառուցողականությունից խոսող իշխանական պատգամավորներին հիշեցրեց նախընտրական քարոզչության ընթացքում Փաշինյանի հայտարարությունները նաև պողպատե մանդատի մասին ու հարց ուղղեց Փաշինյանի ընտրողներին.

«Դուք, ընտրելով երրորդ համարի քվեաթերթիկը, լիազորե՞լ եք արդյոք, որպեսզի Նիկոլ Փաշինյանն առաջարկի, խնդրի, սպառնա, պահանջի Ռոբերտ Քոչարյանի ղեկավարած դաշինքին միասին կառուցողական մթնոլորտում համագործակցություն հաստատել, թե՞ ոչ։ Եթե լիազորել եք, ապա ինչ-որ ձև ցույց տվեք, որ մենք հասկանանք»,-ասաց Ղազինյանն ու նշեց, իշխանությունների լեքսիկոնից չի հավատում, որ նրանք պատրաստ են կառուցողական համագործակցության։

Թե ինչո՞ւ են իշխանություններն անընդհատ խոսում համագործակցության անհրաժեշտությունից, Ղազինյանը հասկացել է պաշտպանության նախարարությունում Փաշինյանի արած հայտարարությունից։

«Այսօր Հայաստանի Հանրապետության շուրջ ունենք բավականին լարված իրավիճակ»,-ասել էր Փաշինյանը։

Ղազինյանն ասաց, հաշվի առնելով, որ ընդդիմադիր խմբակցություններում կան զինվորական, կառավարման գիտելիք, փորձ, կապեր ունեցող գործիչներ, գուցե իշխանությունը ցանկանում է  դրանք ներգրավվել հանուն պետությա՞ն։

«Շատ լավ, ինքը դրա մասին ուղիղ կխոսա, մեզ դա կասի, դրանից հետո մենք կհասկանանք, թե ինչ է պետք անել»,-ասաց նա՝ նշելով, որ «Հայաստան» դաշինքի կազմում ընդգրկված բոլոր պատգամավորներն իրենց ոլորտներում  գործել են հանուն Հայաստանի անվտանգությանը, ազգային ու պետական շահերին, մարդկանց կյանքի որակի բարձրացմանը՝ անկախ հրավերից։