Ձեր վստահելի աղբյուրը

Խաղաղապահ զորախմբի ռուս զինծառայողները հումանիտար-բժշկական ակցիայի շրջանակներում օգնություն են ցուցաբերել Արցախի Մարտակերտի շրջանի հեռավոր բնակավայրերի բնակիչներին: Միջոցառման մասին տեղեկություն է տարածել ՌԴ ՊՆ-ն:

Հաղորդագրության մեջ ասվում է, որ Չափար գյուղի բնակիչներին խաղաղապահները նվիրել են բարեգործական հիմնադրամներից  ստացած մարդասիրական օգնությունը՝ խոհանոցային իրեր և սնունդ: Հատկացված օգնության ընդհանուր քաշը գերազանցել է 4 տոննան:

«Այսօր Մարտակերտի շրջանի Չափար գյուղում հումանիտար-բժշկական ակցիա է անցկացվել, որին մասնակցել է 27՝ 11 բազմազավակ և 16 բռնագաղթածների ընտանիքներ: Բացի այդ, հատուկ բժշկական ստորաբաժանումը օգնություն է ցուցաբերել տեղի ավելի քան 120 բնակչի: Հատկացվել է ավելի քան 4 տոննա հումանիտար օգնություն՝ սննդի փաթեթների տեսքով»,-ասել է ռուսական խաղաղապահ զորախմբի ներկայացուցիչ Ռուսլան Իվանովը:

Ըստ ՌԴ ՊՆ-ի՝ ռուսական խաղաղապահ զորախմբի հատուկ նշանակության ուժերի բժշկական ստորաբաժանման մասնագետները քաղաքացիների ընդունելության կետ են բացել ստանդարտ օդաճնշման ծածկով վրանում: Ռազմական բժիշկները բազմազավակ ընտանիքների և բռնագաղթածների ընտանիքների անդամներին տրամադրել  են բուժական, վիրաբուժական և ակնաբուժական խորհրդատվական բժշկական օգնություն:

«Մեր գյուղի անունից ցանկանում եմ երախտագիտություն հայտնել մարդասիրական և բժշկական օգնության համար: Մեր գյուղը բժշկական օգնության մեծ կարիք ունի և մենք երախտապարտ ենք ռուս խաղաղապահներին այն ցուցաբերելու համար: Մենք ունենք մոտ 400 բնակիչ և բուժկետ, մեկական բժիշկ և բուժքույր: Չունենք ավելի մասնագիտացված օգնություն ցուցաբերելու համար անհրաժեշտ սարքավորումներ»,-ասել է Չափար գյուղի ներկայացուցիչ Էրիկ Թուվոնյանը: