Ձեր վստահելի աղբյուրը

«Շուռնուխում այսօր կանգնած են ադրբեջանցիները, ոչ թե որովհետև նոյեմբերի 9-ին հայտարարություն է ստորագրվել, կամ ոչ թե 2010-ին նման օրենք է ընդունվել, այլ որովհետև պատերազմից հետո բոլորիցս թաքուն, բոլորիս մեջքի հետևում հուշագիր է ստորագրվել»,-ԱԺ-ում հայտարարեց «Հայաստան» խմբակցության պատգամավոր Աննա Գրիգորյանը, որ Սյունիքից է։

Նա մանրամասնեց, որ գաղտնի ստորագրված հուշագրի առաջին կետով հստակ ամրագրվում էր, որ Կովսականի ու Սանասարի հատվածները զիջվում են թշնամուն, այնուհետև հստակ կորդինատներով առանձնացվում է, թե որտեղ են տեղակայվում հայ, ռուս, ադրբեջանցի զինվորականները։

«Հետևաբար ամեն անգամ, երբ խոսում եք Սյունիքում տեղի ունեցողի մասին, խնդրում եմ՝ մի վկայակոչեց 2010-ի «Վարչատարածքային բաժանման մասին» օրենքը, այլ վվկայակոչեք հուշագիրը, որը գաղտնի է ստորագրվել»,-ասաց սյունեցի պատգամավորը։

Աննա Գրիգորյանն ընդգծեց, երբ դա արվում էր, հայտարարվում էր, իբր դրա նպատակը Սյունիքի անվտանգ լինելն է։

«Այսօր Սև լճում, Գեղարքունիքում տեղակայված են ադրբեջանցի զինվորներ, ավելին՝ 20 օրից ավելի է, որ մեր երկու զինծառայողներ պարզապես մոլորվել են։ Դուք որևէ տեղեկություն ունե՞ք այդ մարդկանց մասին։ Եթե ունեք, խնդրում եմ հայտնեք։ Մենք չգիտենք՝ ինչ է կատարվել մեր երկու հայրենակիցների հետ»,-ասաց նա։

Պատգամավորը փաստագրեց, որ, Գորիս-Կապան ճանապարհին եղել է դեպք, երբ ադրբեջանցիները պարզապես քարերով հարվածել են մեքենաներին, վնաս պատճառել։

«Այո, մարդիկ վախենում եմ։ Հետևաբար երբ Նապոլեոնի կեցվածքով ելույթներ եք ունենում, խնդրում եմ, հիշեք, թե ինչ իրավիճակ է մեր երկրում։ Ավելն, ասում են, Սյունիքում, Շուռնուխում մարդիկ մեզ են ընտրել, դուք հպարտանո՞ւմ եք սրանով։

Այսինքն, Սյունիքում թուրքին բերել, մարդկանց դիմաց եք կանգնեցրել ու ասում եք, վայ տեսեք, մեզ ընտրում են։

Սա եզակի ցինիզմ է։ Թյուր տպավորություն է, որ եթե իշխող ուժը հաղթել է ընտրություններում, այլևս ոչ մի բանի համար պատասխանտվություն չի կրում։

Ո´չ, կրում եք։

Եթե մանդատ ունեք ժողովրդի կողմից ստացած, նույնիսկ եթե պողպատյա է, միևնույն է՝, չի լռեցնելու Եռաբլուրում ծածանվող դրոշների ձայնը, չի լռեցնում մեր այն հայրենակցի ձայնը Բաքվի բանտում, ով ադրբեջանցի դատավորին խնդրում է բարեգութ լինել իր նկատմամբ, որովհետև իր մայրը միայնակ է ու իր խնամքի կարիքն ունի... Բոլոր մեղավորները պետք է պատասխանատվության ենթարկվեն, կարծում եմ, այստեղ դիլեմա չկա»,-ասաց սյունեցի պատգամավորը։

Նա նշեց, ընտրություններում հաղթել է իշխանությունը, բայց պարտվել են պետությունն ու պետականությունը։

Գրիգորյանը, նոյեմբերի 9-ը ասելով միայն մարդկանց փողոց դուրս գալն ու ԱԺ մտնելը հասկացող իշխանություններին հիշեցրեց՝ նոյեմբերի 9-ը մեր ազգային խայտառակության օրն էր, երբ կորցրեցինք մեր հայրենիքի մի մասը, նոյեմբերի 9-ը հազարավոր խեղված ճակատագրերի օրն էր։