Ձեր վստահելի աղբյուրը

«Նիկոլ Փաշինյանը և իր թիմակիցները 2016 թվականին հանրության հերթական սուտն ու կեղծիքը մատուցեցին՝ հայտարարելով, թե իբր մասնակցել են ապրիլյան քառօրյա պատերազմին,  եղել են առաջնագծում, մասնակցել են բուն մարտական գործողություններին»,-ԱԺ փոխնախագահի պաշտոնում պատգամավոր Իշխան Սաղաթելյանի թեկնածությունը ներկայացնող Սեյրան Օհանյանին դիմեց «Հայաստան» դաշինքի անդամ Արեգնազ Մանուկյանը և հավելեց, որ իրականում դա սուտ է եղել, քանի որ նրանք գտնվել են առաջնագծից տասնյակ կիլոմետր հեռու և զբաղված են եղել խրամատներ փորելով:

Պատգամավորը «Հայաստան» դաշինքի ղեկավար Սեյրան Օհանյանից ցանկացավ պարզել, թե ինչպե՞ս ՔՊ-ն կարող էր ապրիլյան պատերազմին մասնակցել մայիսին և արդյոք նրանք եղել են մարտական գործողությունների վայրում:

«Հիշեցնեմ, որ մայիսին, այդ խրամատներ փորելու գործընթացին նրանք հասցրեցին հուժկու սելֆիներ անել, ինքնագովազդվել, շոու սարքել և հայրենասեր խաղալ»,- հայտարարեց Մանուկյանը:

Շեշտելով, որ դարերի ընթացքում հայերիս փոխանցված սկզբունք և առանձնահատկություն է միասնականությունը՝ Սեյրան Օհանյանն ասաց, որ արցախյան առաջին ազատամարտի և ապրիլյան պատերազմի ընթացքում այդ միասնությունը ժամանակի իշխանությունները  ապահովել են:

«Կարող եմ ասել, որ այս 44 օրյա պատերազմի ընթացքում այդ միասնության գաղափարը, միասնական գործողությունները, միասնական մոբիլիզացիան չարտահայտվեց մեր ժողովրդի գործողությունների մեջ»,- հայտարարեց «Հայաստան» դաշինքի ղեկավարը:

Նրա խոսքով՝ Փաշինյանի ղեկավարած ջոկատը չի մասնակցել ապրիլյան պատերազմական գործողություններին, այլ կատարել է ինժեներական ապահովման աշխատանքներ, որը չի համարվում մարտական գործողությունների մասնակցություն:

«Այդ աշխատանքների համար բանակի հրամանատարությունը, կարծես թե, գնահատել է և ես  նրանց պատվոգիր եմ տվել, որը որպես հրամանատար իմ կողմից  ստորագրված է և այդ  ստորագրությունը հետ չեմ կարա վերցնել»,-նշեց Սեյրան Օհանյայնը:

«Ի՞նչ եք կարծում, ինչո՞ւ էին նիկոլենք անընդհատ գլուխ գովում, որ մասնակցել են բուն ռազմական գործողություններին»,-իր հարցն փորձեց շարունակել Արեգնազ Մանուկյանը:

ՔՊ խմբակցություններից վրդովմունքի բացականչություններ հնչեցին «նիկոլենք» բառից հետո, ինչին ի պատասխան Մանուկյանը կոչ արեց սովորել ճշմարտությունը լսել, և որ այսուհետ այդպես է լինելու:

ԱԺ նախագահ Ալեն Սիմոնյանն էլ կոչ արեց պատգամավորին կոռեկտ լինել: Արեգնազ Մանուկյանի հարցին, թե որն էր ոչ կոռեկտը՝ Ալեն Սիմոնյանը պատասխանեց .«Վարչապետին անունով, անունը ձևափոխելով կամ որևիցե այլ կերպ դիմելու պարագայում ես կկիրառեմ կարգապահական տույժ  և ընդհանրապես բոլորը պետք է կոռեկտ լինեն դահլիճում»:

Արեգնազ Մանուկյանը հետաքրքրվեց, որ եթե Ալեն ՍԻմոնյանը համաձայն է իր խոսքերի մնացած մասի և հարցի բովոանդակության հետ, ապա ինքը պատրաստ է «նիկոլենք» բառը փոխել «Նիկոլ Փաշինյանը և իր ընկերները» բառերով:

«Պարոն Օհանյան, ի՞նչ եք կարծում, ինչո՞ւ էին Նիկոլ Փաշինյանը և իր ընկերներն անընդհատ գլուխ գովում, թե մասնակցել են 2016 թվականի ապրիլյան պատերազմի բուն մարտական գործողություններին, սակայն իրենց բերած 44 օրյա պատերազմին նրանցից որևէ մեկն այդպես էլ չմասնակցեց և առաջնագծում կռիվ չտվեց, մինչդեռ բարոյապես առնվազն դա պետք է անեին»,-հարցրեց «Հայաստան» դաշինքի պատգամավորը:

«Իմ քայլը» խմբակցությունից կրկին բարձրաձայն ռեպլիկներ հնչեցին:

Անդրադառնալով իշխող խմբակցության այդ պահվածքին՝ Սեյրան Օհանյանը հայտնեց, որ իր համար անհասկանալի է առաջին դասարանցիների պահվածքի նման ձևաչափը, որն ընդունված է քաղաքական մեծամասնության կողմից

«Երեկվա ձեր խոսքերը, այս մի քանի օրվա ձեր պահվածքը, խաղաղության, հանդուրժելի լինելու վերաբերյալ այսօր այդպես չի արտահատվում, թույլ տվեք մարդիկ արտահայտվեն, իսկ դրանց կարող եք պատասխանբել ձեր ելույթների ժամանակ»,-իմքայլական պատգամավորներին դիմեց Օհանյանը:

Ըստ «Հայաստան» դաշինքի ղեկավարի՝ քաղաքական մեծամասնության թիմի մոտ PR-ի աստիճանը շատ բարձր է, և այն երևացել է ոչ թե նոր, այլ երեք տարիների ընթացքում:

«Ես գլուխ եմ խոնարհում այն մարդկանց առաջ, ովքեր եղել են 44-օրյա պատերազմում, բայց երբ որ գլուխ են բարձրացնում այն մարդիկ, ովքեր պատերազմի օրերին այս կամ այլ տեղ գնացել հյուրանոցներում պառկել քնել են և այսօր պատգամավորի այս խոսքերը լսելիս թողնում դուրս են գալիս դահլիճից, դա ինձ համար անընդունելի է»,-եզրափակեց Սեյրան Օհանյանը: