Ձեր վստահելի աղբյուրը

«Քաղաքական մեծամասնությունը, այս իրավիկճակում, երբ որ երկիրն իրենց ձեռքով ավերել է, քանդվել է, եկել է այստեղ ձեզ պրիմիտիվ խաղերով, ուզում է ապացուցել, որ ընդդիմությունն այնքան անմիասնական է, որ չի կարողանում իր իսկ թեկնածուի օգտին քվեարկել»,-ԱԺ փոխխոսնակի ընտրության հարցի վերաբերյալ ելույթ ունենալով՝ ժողովրդին դիմեց «Հայաստան» դաշինքի պատգամավոր, զոհված զինծառայողի հայ Գեղամ Նազարյանը:

Նա տեղեկացրեց, Իշխան Սաղաթելյանի կյանքի նպատակը չէ ԱԺ փոխխոսնակ ընտրվելը և խմբակցությունում երկար քննարկել են այդ պաշտոնում առաջադրելու հարցը և եկել այն եզրակացության, որ երկրում խնդիրներ լուծելու համար առաջադրելը ճիշտ կլինի:

Պատգամավորը բացատրեց, թե ՔՊ-ն ինչով է զբաղված ԱԺ-ում ունենալով 71 ձայն, իսկ ընդդիմությունը՝ 33 ձայն և շեշտեց, որ եթե իշխող ուժը ցանկանա լուծել հարցն, ապա կքվեարկեն համապատասխան կողմ ձայներով:

«Երբ որ դեռ ամեն օր Եռաբլուրում շարունակվում են հերոս տղերքի հուղարկավորությունները, ՔՊ-ն եկել է այստեղ, որ պարզագույն խաղերով ձեզ հերթական անգամ խաբի, թե՝ տեսեք ինչքան լավն ենք, իսկ ընդդիմադիր խմբակցությունները ինչ վատն են»,-ասաց պատգամավորը:

Նազարյանը հայտարարեց, որ ԱԺ փոխխոսնակին առաջին փուլով չընտրելով, ժողովրդի փողերով իշխող ուժը ԱԺ-ում ժամավաճառություն է անում և ոզում է ասել, որ ընդդիմությունից բացակա պատգամավոր կա, իսկ երկրորդ փուլը ձախողելով էլ ցանկանում է ասել, որ ընդդիմությունն անմիաբան է:

«Ժողվուրդը խելացի է, ճիշտ է՝ դուք ահագին մարդկանց խաբել եք տարատեսակ ստերով, որոնց հիման վրա էլ ձայն եք ստացել, օրինակ՝ թե 30 տարի առաջ դեռ Արցախը ծախել են և խեղճ հարիֆի ջեբը պատերազմ ու պարտություն  էին գցել, հիմա նույն եղանակով եկել շարունակում եք այստեղ»,-շեշտեց Գեղամ Նազարյանը:

Նրա խոսքով՝ կա խորհրդարանական մեծամասնություն, որը պետք է ապահովի կողմ ձայները, կամ պետք է հայտարարի, որ ԱԺ նախագահությունում չի ցանկանում տեսնել ընդդիմության ներկայացուցչին:

«Այս պրիմիտիվ խաղերով եթե այստեղ այսպես եք, բա կառավարությունում ինչե՞ր եք անելու, բա Սյունիքի բարձունքներն ինչպե՞ս եք պաշտպանելու, բա Արցախի խնդիրն ինչպե՞ս եք լուծելու, բա էս քայքայված տնտեսությունն էլի մանկապարտեզային խաղերո՞վ եք վերականգնելու: Այն տղաները որոնք սահմանին կանգնած զոհվում էին, մեծապես թքած ունեին, թե մենք ինչ քաղաքական հայացքներ ունենք, նրանք հայրենիքը իրենց կյանքով էին պաշտպանում, ոչ թե, որ մենք այսօր գանք այտեղ տունտունիկ խաղանք ու ասենք՝ տեսեք մի պատգամավոր բացակա է, իսկ իրենք անմիաբան: Բա դուք ինչ եք, դուք էլ եք անմիաբան»,-ՔՊ-ի պատգամավորներին դիմեց «Հայաստան» դաշինքի պատգամավորը:

Նրա խոսքում՝ ՀՀ տարբեր գյուղերում մարդիկ ձայն են տվել պատգամավորներին՝ նրանց աշխատանքը տեսնելու ակնկալիքով, իսկ խորհրդարանում այսօր հումորներ ու կատակներ են անում:

«Այս ամեն ինչը կընդունվեր, կուտվեր, եթե այսօր մենք ոչ թե Շուշին հանձնած լինեինք, մեր տղերքին էլ՝ զոհաբերած, այլ Գանձակում նստած լինեինք»,-նշեց պատգամավորը և պատերազմում զոհված և կենդանի տղաների անունից իրեն իրավունք վերապահեց խնդրելու խորհրդարանականին, որ լրջանան և ԱԺ-ում ստեղծված վիճակը փոխեն: