Ձեր վստահելի աղբյուրը

«Իմ մոտ համոզմունք է ձևավորվում, որ սա հետևողական՝ ոչ միայն պատմական փաստերը խեղաթյուրելու, այլ, ըստ էության, մեր թշնամիներին սպասարկելու ուղիղ օրակարգ է: Եթե մարդիկ տեղյակ չեն պատմությունից, ապա այն չի հիմնավորում, որ նրանք պետք է հիմնարար և տգետ հայտարարություններ անեն մեր պետականության հասցեին»,-ԱԺ-ում հայտարարեց Արծվիկ Մինասյանը՝ անդրադառնալով իշխող խմբակցության պատգամավորների ելույթներում Բաթումիի պայմանագիրը կնքելու մեջ ՀՅԴ-ին մեղադրելու դրույթներին:

Մինասյանի խոսքով՝ 1918 թվականին Բաթումիի պայմանագիրը կքվել է Հայաստանի անկախության համար և, 12 հազար քառ.կմ տարածքի վրա անկախություն ձեռք  բերելով, Հայաստանը կարողացել է իր տարածքներն ընդլայնել:

Անդրադառնալով Ալեքսանդրապոլի պայմանագրին՝ «Հայաստան» դաշինքի քարտուղարը հայտնեց. «Միայն ու բացառապես հայ ժողովրդի մի հատվածի փրկության համար ձևական ստորագրված Ալեքսանդրապոլի պայմանագրի անընդհատ վկայակոչելը ոչ ավել, ոչ պակաս՝ թուրք-ադրբեջանական շահի սպասարկում է նշանակում»:

Ըստ Մինասյանի՝ 1920 թվականին դաշնակցական կառավարությունը բոլշևիկյան իշխանություններին թողել է 42 հազար քառ. կմ տարածքով երկրի հնարավորություն  որը գիտականորեն և փաստաթղթերով հիմնավորված է:

Նրա խոսքով՝ այդ պայմանագրերի էությունը խեղաթյուրելու ԱԺ պատգամավորների հակահայ պահվածքը ոչ թե քաղաքական ուժին վարկաբեկելու փորձ է այլ՝ պետականությունը կազմաքանդելու գործ:

Արծվիկ Մինասյանը զարմացավ, որ նման հայտարարություններ են անում նրանք, ովքեր իրենց համարում են հայրենիքը կորցրածների 2-3-րդ սերունդ և այսօր կանգնած են այն իշխանության մեջ, որը հայրենիք է հանձնում:

Նա հայտարարեց, որ օրենսդրական նախաձեռնության անհրաժեշտություն կա, որով սուտը, կեղծիքը և պատմական իրողությունը խեղաթյուրելու, Հայոց պետականությանը  վնասելու վարքագծի համար քրեական պատասխանատվություն կսահմանվի:

«Համագործակցության մասին մեծամասնության կոչերի ֆոնը ճաք տվեց, երբ որ դիջեյական բառակապակցություններով «էկզոտիկ մտքեր» բառակապակցությունն են օգտագործում մարդիկ՝ այստեղ մեզ վերագրելով այդ մտքերը»,- հայտարարեց պատգամավորը և հավելեց. «Ինչո՞ւ են մարդիկ այսօր իրենց կյանքը բարդացնում, իրեց առերևույթ, հնարավոր հանցագործությունների հանգամանքներն ավելի ծանրացնում, ինչո՞ւ: Ես կարծում եմ, որ իրենք առաջնորդվում են այն մտքով, որ ինչքան սուտ ասեն, այնքան կհիմնկավորեն, որ այդ սուտը ճիշտն է և ինչքան շատ ասեն, այնքան մարդկանց ուղեղներում այն կտպավորվի»: 

Արծվիկ Մինասյանը հայտնեց, որ նման գործելաոճը հակոտնյա է խորհրդարանական երկրին, իսկ ժամանակն ամեն ինչ իր տեղը կդնի և բոլոր նրանք, ովքեր սպասարկում են օտարի, թշնամու օրակարգը պատասխան կտան: