Ձեր վստահելի աղբյուրը

«Ես հավատում եմ, որ Հայաստանը և Արցախը պետք է ոտքի կանգնեն և մեր պայքարն ուղղված է հենց դրան»,- իր եզրափակիչ ելույթում անդրադառնալով եզդի պատգամավոր Ռուստամ Բաքոյանի ելույթում հնչեցված մտքին, թե Երկրորդ համաշխարհային պատերազմից հետո Գերմանիան և Ճապոնիան ոտքի կանգնեցին և Հայաստանը նույնպես ոտքի կկանգնի՝ ասաց ԱԺ փոխխոսնակի ընդդիմության թեկնածու Իշխան Սաղաթելայնը:

«Հայաստան» դաշինքի պատգամավորը հիշեցրեց, որ վերոնշյալ պարտությունից հետո Գերմանիայի ղեկավարն ինքնասպան էր եղել, իսկ Ճապոնիայում մինչև 1945 թվականի հայտնի կապիտուլացիայի պայմանագրի ստորագրումը մի շարք վարչապետերի փոփոխություն էր տեղի ունեցել:

Անդրադառնալով ՔՊ խմբակցության անդամների ելույթներում հնչեցված մթնոլորտը փոխելու, կառուցողական լինելու և ատելության խոսքը չտարածելու մասին կոչերին՝ Իշխան Սաղաթելյանը հայտարարեց, որ իշխող խմբակցության ներկայացուցիչներն անկեղծ չեն՝ ասում են մի բան և անում մեկ այլ բան:

«Այն պահին, երբ այս ամբիոնից նման հայտարարություններ եք անում, զուգահեռ շարունակվում են հետապնդումները մեր քաղաքական թիմի ներկայացուցիչների, մեր ընկերների նկատմամբ, որոնք շարունակում են գտնվել կալանքի տակ»,-հայտնեց ԱԺ փոխխոսնակի թեկանծուն և հավելեց, որ վերջին օրերին հետևողական քայլեր են ձեռնարկվում նաև այն մարդկանց և բիզնեսի ներկայացուցիչների նկատմամբ, որոնք համարձակվել են չքվեարկել իշխող ուժի օգտին, այլ ունեն այլ քաղաքական հայացքներ:

Ըստ Սաղաթելյանի, համերաշխության մասին ելույթներով իշխող քաղաքական ուժը ցանկանում է տեսարան և իրավիճակ ստեղծի, թե իբր իշխանությունը լավն է, ցանկանում է համագործակցել, բայց ընդդիմությունը խանգարում է իրեն:

«Այդպես չէ, քանի որ ձեր իշխանության հիմքում դրված է պառակտումը, ատելության խոսքի տարածումը և վերջին երեք տարիներին դուք այն հետևողական իրականացրել եք»,-հայտարարեց «Հայաստան» դաշինքի պատգամավորը: