Ձեր վստահելի աղբյուրը

«Պարոն վարչապետ, առաջինը պետք է ասեմ, որ դեռ պետք չէ թերագնահատել տրադիցիոն տաքսի ծառայությունը, մեր գնահատումներով այն դեռևս մեր շուկայի կեսից ավելին է»,-կառավարության նիստում Նիկոլ Փաշինյանին արձագանքեց Վահան Քերոբյանը

Մինչ այդ Փաշինյանը, հույս հայտնելով, որ տաքսու վարորդները շատ չեն նեղանա իր ձևակերպումից, հայտարարեց, որ ստանդարտ տաքսի ծառայության այդ հատվածը մեռնող է՝  նկատի ունենալով տաքսիները ձեռքով կանգնեցնելու և անմիջապես վարորդին վճարելու օրինակը և նկատեց, որ ներկայում ավելի շատ ինտերնետի միջոցով են վճարում:

Նրա խոսքով, պայմանավորվել էին, որ տաքսիների որակի ստանդարտների բարձրացումը պետք է սկսեին օդանավակայանից և հետագայում տարածեին ամբողջ երկրում:

Վահան Քերոբյանը հայտնեց, որ խնդիրները կարելի է լուծել տաքսիների որակի ստանդարտները պլատֆորմերին պարտադրելու միջոցով:

Քննարկումը ծավալվեց ՀՀ հարկային օրենսգրքում փոփոխությունների նախագծի քննարկման ժամանակ, որով առաջարկվում է հարկել էլեկտրոնային հարթակներում տեղադրվող գովազդները:

Վահան Քերոբյանը նշեց, որ այդ կարգավորման բացակայության պատճառով «Յանդեքս»  տաքսին, որպես այլ երկրում գրանցված ընկերություն ավելացված արժեքի հարկ չէր վճարում, իսկ GG տաքսին վճարում էր:

«Սա մի քիչ շուտ անեինք՝ ընտրություններից առաջ ահագին հարկ կգենարեցվեր: Ինչո՞ւ չարեցինք, պարո՛ն Քերոբյան»,-հռետորական հարցադրում հնչեցրեց Փաշինյանը:

Ներկայացնելով նախագիծը՝ ՊԵԿ նախագահը Ռուստամ Բադասյանը տեղեկացրեց, որ էլեկտրոնային ծառայությունների մատուցման վայրը որոշվելու է ստացողի վայրով:

«Նախագծով խոսքը վերաբերում է բացառապես ֆիզիկական անձանց մատուցվող էլեկտրոնային ծառայություններին, այսինքն՝ կազմակերպությունների դեպքում արդեն իսկ կարգավորված են ԱԱՀ-ի հաշվարկման վճարման հետ կապված հարաբերությունները»,- ասաց Բադասյանը և հավելեց, որ այն գործելու է 2022 թվականի հունվարի 1-ից և մինչ այդ պետք է այդ ծրագիրը գործադրվի:

ՊԵԿ նախագահի խոսքով՝ նախագծով  կարգավորվում է ՀՀ-ում մշտական հաստատություն չունեցող ոչ ռեզիդենտ ընկերությունների կողմից Հայաստանում գտնվող ֆիզիկական անձանց մատուցվող էլեկտրոնային հարկման հետ կապված հարաբերությունները:

Ըստ Բադասյանի՝ օրենսգրքում նման կարգավորման բացակայության պայմաններում պետական բյուջեն կորցնում է ավելացված արժեքի հարկի գծով եկամուտներ:

Բադասյանը հայտնեց, որ ներկայացված փոփոխություններով Հարկային օրենսգրքում ավելացվում է էլեկտրոնային ծառայություն հասկացությունը, որը նույնական է ԵԱՏՄ պայմանագրի 18 հավելվածի հասկացությանը:

Նա ընթերցեց օրենքի նախագծով առաջարկված ձևակերպումն, ըստ որ՝ էլեկտրոնային եղանակով ծառայությունների մատուցումը ՝ տեղեկատվական և հեռահաղորդակցական ցանցի (էլեկտրակապի) միջոցով ծառայությունների մատուցումը, այդ թվում՝ համացանցի (ինտերնետի) միջոցով, որի մատուցումն անհնար է՝ առանց տեղեկատվական տեխնոլոգիաների օգտագործման:

Բադասյանը հայտնեց, որ Էլեկտրոնային ծառայությունների մատուցման վայրը որոշվելու է ստացողի վայրով և համարվելու է, որ մատուցման վայրը ՀՀ-ն է եթե  ֆիզիկական անձի բնակության վայրը, բանկի գտնվելու վայրը, որում բացված է հաշիվը, էլեկտրոնային ծառայությունների ստացման նպատակով ֆիզիկական անձի կողմից օգտագործված ցանցային հասցեն  և  հեռախոսահամարի երկրի միջազգային ծածկագիրը գտնվում են ՀՀ-ում: