Ձեր վստահելի աղբյուրը

ԱԺ-ում հանձնաժողովների ձևավորման երկու նախագիծ է ներկայացվել՝ մեկը ՔՊ-ի, մյուսը՝ ընդդիմադիր խմբակցությունների կողմից։

ՔՊ-ական Վլադիմիր Վարդանյանը, ներկայացնելով նախագիծը, ասաց՝ առաջարկում են ստեղծել 12 մշտական հանձնաժողով՝  առանձնացնելով առողջապահության ու սոցիալական հարցերի հանձնաժողովները։

Նպատակը, ինչպես ասաց ՔՊ-ական պատգամավորը,  աշխատանքների արդյունավետության բարձրացումն է։

Նախագծով առաջարկվում է՝ ԱԺ մշտական հանձնաժողովների նվազագույն թիվը սահմանել 8։

Սահմանադրության համաձայն՝ մշտական հանձնաժողովներում տեղերը բաշխվում են խմբակցություններում ընդգրկված պատգամավորների թվի համամասնությամբ:

Վարդանյանն ասաց՝ հաշվի առնելով, որ ութերորդ գումարման Ազգային ժողովի «Քաղաքացիական պայմանագիր» խմբակցությունն ունի 71, «Հայաստան» խմբակցությունը՝ 29, իսկ «Պատիվ ունեմ» խմբակցությունը՝ 7 անդամ՝  առաջարկվում է ԱԺ մշտական հանձնաժողովների անդամների նվազագույն թիվը սահմանել 8, իսկ մյուս հանձնաժողովների անդամների ընդհանուր թիվը սահմանել նրանց ծանրաբեռնվածության, ինչպես նաև այն հաշվարկով, որ «Քաղաքացիական պայմանագիր» և «Հայաստան» խմբակցությունները մշտական հանձնաժողովներում ունենան իրենց անդամների ընդհանուր թվին հավասար տեղեր, իսկ «Պատիվ ունեմ» խմբակցությունը յուրաքանչյուր  հանձնաժողովում ունենա մեկ տեղ: