Ձեր վստահելի աղբյուրը

«Ազգային Ժողովի դերակատարումը հանրային, պետական կյանքում պետք է դառնա որոշիչ, այդ թվում հանձնաժողովների միջոցով»,- ասաց «Հայաստան» խմբակցության պատգամավոր, Հայաստանի նախկին փոխվարչապետ Արմեն Գևորգյանը՝ ելույթ ունենալով ԱԺ ամբիոնի մոտ։

Նա նշեց՝ պատահական չէ, որ հարց է բարձրացրել Հանրային ծառայության բարեփոխումների փաթեթի մասին։ Գևորգյանի խոսքով, վերջին տասն օրվա ընթացքում մանրակրկիտ կերպով կարդում է այդ փաստաթուղթը։

«Ցավոք սրտի, փաստաթղթի հեղինակները կամ մինչև վերջ չեն ըմբռնել հանրային ծառայությունը, կամ որոշել են այն ասոցացնել գործադիր իշխանության հետ, կամ էլ ըստ էության, պատրաստ չեն պետության այլ ճյուղերի մասով լուրջ առաջարկություններ ներկայացնել»,- կարծիք հայտնեց Գևորգյանը։

Դիմելով ԱԺ պետաիրավական հարցերի մշտական հանձնաժողովի նախագահի պաշտոնում առաջադրված ՔՊ-ական Վլադիմիր Վարդանյանին՝ ընթերցեց օրենքի 4-րդ  հոդվածը, որի համաձայն հանրային պաշտոնը ընտրովի կամ նշանակովի պաշտոններ են, որոնք զբաղեցնում են քաղաքական գործընթացների, հայեցողական որոշումների, ինչպես նաև օրենքով սահմանված այլ ընթացակարգերի արդյունքում։ Ընդդիմադիր պատգամավորը մանրամասնեց, այսինքն, խոսքը վերաբերում է նաև Ազգային Ժողովին։

«Այսինքն, գործադիր մարմինն այն ծավալով ու ձևով չպետք է որոշի հանրային ծառայությունների ուղղությունն ու օրակարգը, որով այսօր այդ ձգտումը դրսևորվում է»,- ասաց Արմեն Գևորգյանն ու նշեց, որ ԱԺ-ն այդ գործում պետք է ստանձնի առաջատարի դեր և այն ուշադրության կենտրոնում պահի։

Ի դեպ, պատգամավորը նկատեց, որ սահմանադրական փոփոխություններից առաջ խոսել հանրային ծառայությունների բարեփոխումների մասին, պրոցեսն ինքնանպատակ է դարձնում։

«Եթե լինելու են սահմանադրական փոփոխություններ, դա բերելու է այն բանին, որ հանրային ծառայության տարբեր պաշտոններ կարող են ունենալ տարբեր կարգավիճակներ, նոր կամ բոլորովին վերափոխված լիազորություններ։ Խոսել այսօր հանրային ծառայությունների համակարգի բարեփոխման մասին՝ չիմանալով սահմանադրական փոփոխությունների օրակարգը, չիմանալով, թե ինչ ճանապարհով ենք գնալու, տպավորություն է ստեղծվում, որ պրոցեսն ինքնանպատակ է, և ոչ թե ուղղված է համակարգի բարելավմանը»,- ասաց նա։

Գևորգյանի խոսքով, հայեցակարգում կարմիր թելի պես անցնում է այն գաղափարը՝ հանրային ծառայության բարեփոխումների ամբողջ իմաստն այն է, որ հանրային ծառայողը կաշկանդված չլինի ու կախված չլինի օրվա քաղաքական պրոցեսներից։

«2021 թ. հունիսի 20-ի ընտրություններից հետո բազմաթիվ հայտարարություններ են հնչել բազմաթիվ պաշտոնյաների կողմից այն մասին, որ պետական ծառայողները պետք է ամբողջությամբ հնազանդվեն գործող քաղաքական ուժի քմահաճույքներին կամ պատկերացումներին, ծրագրերին։ Այս առումով, այս փոխկապակցվածությունը շեղո՞ւմ է, թե՞ լավ նպատակ, որը դեռ պետք է իրականացվի։ Կյանքում անգամ փաստաթուղթը հրապարակելուն զուգահեռ մենք լրիվ ուրիշ գործընթացներ ու հանգամանքներ ենք տեսնում»,- ասաց պատգամավորն ու առաջարկեց ԱԺ աշխատանքը դիտարկել որպես լիարժեք վերահսկողության հնարավորություն գործադիր մարմնի ու հանրային ինսիտուտների, այդ թվում դատարանների ու արդարադատություն ապահովող այլ մարմինների նկատմամբ։

Նա հորդորեց՝ ԱԺ-ին չսահմանափակել իր լիազորությունների ու պարտականությունների մեջ, հակառակ դեպքում դառնալու են օրենքների դակիչներ, որի ակնկալիքը չեն ունեցել թե իշխանությանը, թե ընդդիմությանը ձայն տված մարդիկ։