Ձեր վստահելի աղբյուրը

«Պարոն Վարդանյան, եթե չուտենք, չխմենք ու ձեզ լսենք՝ Հայաստանում իդեալական վիճակ է, մի երկու իրավական խնդիրներ կան, որոնք կուղղենք և ամեն ինչ լավ կլինի, բայց, ցավոք, մենք ձեր և ՔՊ իրականությունում չենք»,- պետաիրավական հարցերի նախագահի ՔՊ-ական թեկնածու Վլադիմիր Վարդանյանի ելույթին արձագանքեց «Հայաստան» խմբակցության պատգամավոր Քրիստինե Վարդանյանը:

Նա հիշեցրեց, որ մայիսի 17-ին հանրային քննարկման ժամանակ Վլադիմիր Վարդանյանը հայտարարել էր. «Մեր բանակը պաշտպանում է ժողովրդին, այլ ոչ թե որոշակի ամայի տարածքներ» և հորդորեց վերջինիս կոնկրետ ասել, թե ի՞նչ նկատի ունի ամայի տարածքներ ասելով և նշի Հայաստանի այն աշխարհագրական կետերը, որոնք համարում է ամայի տարածքներ:

Քրիստինե Վարդանյանը հետաքրքրվեց, թե երբ է իշխող ուժը հասցրել փոխել Սահմանադրության 14-րդ հոդվածը, որում ամրագրվում է, որ ՀՀ Զինված ուժերն ապահովում են ՀՀ պաշտպանությունը, անվտանգությունը, տարածքային ամբողջականությունը և սահմանների անձեռնմխելիությունը

Վլադիմիր Վարդանյանը պատգամավորին հորդորեց ուտել և խմել, քանի որ չուտելը վատ է առողջությանը և նշեց, որ իրականությանը երբեք վարդագույն ակնոցներով չի նայել:

ՔՊ թեկնածուն հայտարարեց, որ «Հայաստան» խմբակցության պատգամավորի հրապարակված խոսքերն իր ելույթից անջատվել են այն բանից հետո, երբ ինքը խիզախություն է ունեցել որոշ ուժերի անվանել 5-րդ շարասյուն:

«Ձեզ երևի պետք է, որ ծանոթ լինի Terra nullius դոկտրինը, ինչը նշանակում է տարածք, որը որևէ մեկին չի պատկանում, խոսքը վերաբերում է կղզիներին, որոնք տեսականորեն կարող են ինչ-որ մի տեղ առաջանալ հրաբուխներից»,- պատասխանեց Վլադիմիր Վարդանյանը և հավաստիացրեց, որ այդ հաղորդման ժամանակ ներպետական կոնսոլիդացիայի կոչ է արել, որը հնարավորություն կտար ավելի արդյունավետ պաշտպանել սահմանները:

Քրիստինե Վարդանյանը խնդրեց հստակ ասել, թե որն է ՀՀ ում ամայի տարածքը, և չխուսափել պատասխանից, իսկ եթե Վլադիմիր Վարդանյանը սխալվել է, ապա պետք է ներողություն խնդրի:

ՔՊ պատգամավորը հայտարարեց, որ ՀՀ սահմանից ներս գտնվող յուրաքանչյուր թուփ և քար գտնվում է ՀՀ բանակի պաշտպանության ներքո: